Груевски ги кани СДСМ, ДУИ и ДПА на лидерска средба
Средбата ќе биде посветена на претстојните избори
Премиерот Никола Груевски вчера испрати писмо до лидерите на трите најголеми парламентарни партии со кое ги кани на лидерска средба в недела во Клубот на пратениците. Средбата, како што се наведува во писмото, ќе биде посветена на прашања поврзани со претстојните претседателски и локални избори и разгледување на сите аспекти како предуслов за нивно одвивање во фер и демократска атмосфера.
„Претстојните изборни циклуси во нашата држава, потребата од нивно одвивање во фер и демократска атмосфера и натамошното унапредување на демократските процедури во нивното спроведување, е едно од приоритетните прашања со кои се соочува нашата држава, и тоа е од значење за натамошната европска интеграција на Република Македонија и нејзиниот севкупен демократски развој. Земајќи го предвид фактот што успешното одвивање на овие процеси е предодредено од постоењето на политичка волја, позитивен пристап и посветеност од сите политички субјекти во државата, а со цел градење позитивна атмосфера во пресрет на изборите, истакнување на политичката одговорност, како и демонстрирање заедништво околу овој важен приоритет, ве поканувам да оствариме заедничка средба на која би присуствувале лидерите на четирите најголеми парламентарни партии“, се вели во писмото што премиерот Груевски го испрати до СДСМ, ДУИ и ДПА.
„Веруваме дека Груевски е свесен дека декларацијата за фер и демократски избори ја потпиша во истото друштво во кое ги организираше предвремените парламентарни избори поради кои Македонија доби единица по демократија“, се вели во вчерашната реакција на СДСМ.
Оваа партија ја потсети владејачката коалиција дека не е доволна само декларативна заложба за фер и демократски избори туку како власт на терен да обезбеди услови за такви избори.
„Ако по утрото се познава денот, тогаш јасно е дека Груевски, ВМРО-ДПМНЕ и потписниците на декларацијата немаат воопшто намера да организираат фер избори“, нагласуваат од СДСМ и бараат Груевски јавно да се обврзе дека на гласачките места ќе биде забрането користење на мобилните телефони.
„За разлика од ВМРО-ДПМНЕ, ние ќе сториме се' што е во наша моќ претстојните избори да бидат одржани во атмосфера што и'прилега на земја која сака да влезе во ЕУ и во НАТО“, велат од СДСМ и додаваат дека нивниот пристап ќе му го повторат на Груевски и на претстојната лидерска средба. (П.Р.) |
