Претходен број

Жешки точки на изборната мапа

Ќе успее ли Зоран Заев да го зачува своето место во Струмица пред Силвана Бонева, е едно од најинтересните прашања

Струмица, Куманово, Велес, Струга, Гостивар се дел од општините во кои се очекува интересен изборен натпревар

Александра М. Митевска

Додека пред очите на граѓаните секојдневно се вртат сцените од спектаклот наречен претседателски избори, во заднината тивко, ама интензивно се подготвуваат тактиките за освојување на локалната власт. Притоа, се пресметува и во колкав процент гласовите што би ги освоил одреден градоначалнички кандидат би легнале на контото на претендентот за претседател од истата политичка опција – и обратно.

„Во изборите се испреплетуваат многу интереси - партиски, но и лични. Сепак, на претседателските избори еден е победникот, а на локалните учествуваат многу актери, така што е јасно каде интересот е поголем“, изјави неодамна Стефан Буџаковски, професор на ФОН.

Професорката Билјана Ванковска, пак, во една прилика коментираше: „Штом толку пратеници решиле да се кандидираат за градоначалници, јасно е дека во локалната власт лежат ресурсите“.

Струмица, Велес, Куманово, се некои од градовите во кои владејачката партија реши да игра со проверени адути. На териториите на овие три општини се очекува мошне интересна битка, бидејќи владејачките партии имаат големи амбиции да ги освојат досегашните упоришта на опозицијата. Доп��рна точка на овие општини им е што досега имаа опозициски градоначалници кои се популарни меѓу своите сограѓани и кои претендираат на уште еден мандат. Сепак, резултатите од ланските парламентарни избори не го потврдија бодовното салдо на опозицијата од 2005 година. Затоа и се наметнува прашањето што овој пат ќе биде пресудно за граѓаните – профилот на кандидатите за градоначалници или нивната партиска припадност.

Пред четири години, Зоран Заев победи во Струмица уште во првиот круг, со над 17 илјади гласа. Но, минатата година СДСМ во таа општина доби околу 15 илјади гласа наспроти 15.900 за ВМРО-ДПМНЕ. Струмица, секако, претставува посебен предизвик за владејачката партија, бидејќи тамошниот градоначалник на претстојните избори ќе настапи во двојна улога – и како водач на опозицијата. Затоа, веројатно, не случајно вмровците решија да му ја спротивстават на Заев токму Силвана Бонева, која ем е координаторка на пратеничката група ем е член на Извршниот одбор на партијата.

Од пратенички позиции ќе настапат и Петар Поп Арсов во Куманово и Горан Петров во Велес, во обид да им ги преземат функциите на актуелните градоначалници од СДСМ и од ЛДП – Зоран Дамјановски и Аце Коцевски.

Дамјановски во 2005 ја освои градоначалничката функција во Куманово со околу 24,5 илјади гласа, но на последните парламентарни избори СДСМ во таа општина доби малку повеќе од 11 илјади гласа, а ВМРО-ДПМНЕ близу 19,5 илјади. Коцевски, пак, на претходните локални избори по втор пат стана градоначалник на Велес со над 12, 5 илјади гласови, за лани коалицијата „Сонце“ таму да освои околу 7,5 илјади гласа, за разлика од ВМРО-ДПМНЕ, која доби приближно 16 илјади.

Кои се другите жешки точки на изборната мапа?

Во Кочани досегашниот градоначалник од СДСМ, Љубомир Јанев, се откажа од уште една кандидатура, препуштајќи му ја битката на сопартиецот Влатко Серафимовски. Тој, пак, ќе се соочи со противкандидатот на Јанев од изборите во 2005 – пратеникот на ВМРО-ДПМНЕ, Ратко Димитровски. Оваа општина многу години важеше за бастион на социјалдемократите, кои лани, сепак, „се лизнаа“ на 7,7 илјади гласа, во споредба со 11,7 гласа за ВМРО-ДПМНЕ. Во Охрид, пак, Кирил Трендафилов-Нанче (кој на претходните локални избори, како кандидат на ВМРО-НП, за малку ја изгуби градоначалничката трка) годинава го облече дресот на ВМРО-ДПМНЕ во обид да го загрози стариот ривал Александар Петровски од СДСМ.

Интересна битка се очекува во Струга, која во изминатиот период живее во знакот на меѓуетничките тензии меѓу средношколците. Аналитичарот Нејази Мухамеди не ја исклучува можноста во оваа општина (која со територијалната организација од 2004 е со мнозинско албанско население) да поентира кандидат од македонскиот блок, како резултат на поголемата конкуренција во албанскиот кампус. Освен тоа, таму за градоначалник е кандидиран и претседателот на ПЕИ Фиат Цаноски, кој би можел да очекува поддршка од СДСМ, но и од гласачи од двете најголеми етнички заедници.

Ниту на досегашниот градоначалник на Гостивар, Невзат Бејта од ДУИ, не му е однапред загарантиран вториот мандат. Нему позициите ќе се обиде да му ги загрози некогашниот гостиварски градоначалник – популарниот Руфи Османи.

На територијата на главниот град како жешка точка се посочува Сарај, каде што се очекува битка за превласт меѓу ДПА и Нова демократија на Имер Селмани. За ВМРО-ДПМНЕ, пак, е голем предизвик премиерно да ја преземе локалната власт во Карпош, каде што од опозициските редови обид за враќање на градоначалничката функција ќе направи Стевчо Јакимовски. Социјалдемократите, пак, сметаат дека по двата градоначалнички мандати на Аларова, сега имаат шанса да се вратат на власт во Центар.

Во секој случај, не се исклучени изненадувања, особено кога станува збор за комплексни избори – какви што се локалните. Последните избори во 2005 година траеја речиси два месеца, при што неочекувано најмногу врева се крена околу две помали општини – Долнени и Маврово, каде што се водеше жестока борба меѓу тогашните коалициски партнери на централно ниво СДСМ и ДУИ.

На тие избори СДСМ (во коалиција со ЛДП) освои 37 градоначалнички места, за разлика од тогаш опозициската ВМРО-ДПМНЕ, кој доби 21 градоначалник, но ги освои речиси сите скопски општини и неколку поголеми општини во внатрешноста. ДУИ се избори за15 градоначалнички места, а ДПА победи само во Сарај. Седуммина независни кандидати стигна до градоначалничка фотелја, дел од нив со поддршка од ВМРО-ДПМНЕ или од СДСМ. ВМРО-НП се избори за тројца градоначалници, а Сојузот на Ромите победи во Шуто Оризари.