Се избира ректор за неформиран информатички универзитет
Власта на нероден Петко капа му крои, обвини вчера пратеникот на СДСМ Јани Макрадули
Анонимуси и уметници по поезија, танц и јавање ќе држат информатички предмети
Жаклина Хаџи-Зафирова
Опозицијата вчера го оквалификува како скандал проектот за формирање универзитет за информатички технологии, кој беше на дневен ред на вчерашната собраниска седница и го помина првото читање. Новиот универзитет за информатички технологии е преименуван во „македонски“, а во образложението за неговото основање авторите на текстот се повикуваат дека основањето на универзитетот е „врз основа на политичката програма на ВМРО-ДПМНЕ“.
Пратеникот од СДСМ, Јани Макрадули, од собраниската говорница го оцени како небулоза фактот што ден пред собраниската расправа за универзитетот, власта објавила оглас за избор на ректор, иако се' уште не се расправало за измените во законот за универзитетот.
„Власта на нероден Петко капа му крои. На недонесен закон објави конкурс за избор на ректор за универзитет, иако сите знаат дека тоа ќе биде таткото на еден министер, односно господинот Благоја Самакоски“, рече Макрадули. Тој обелодени делови од документот за универзитетот, за кој кажа дека „ќе биде во функција на фабриката на Самакоски, кој ќе стане ректор, иако со години бил на црната листа на Америка“. Како една од нелогичностите во проектот, кој Владата го усвоила на 14 јануари, Макрадули посочи на изборот на „привремен ректор преку дискрециони фондови“.
Како срамни и смешни тој ги посочи и изборните предмети наведени во проектот за универзитетот, каде што на студентите им се нудат танц, музика и спортови. „ВМРО-ДПМНЕ решил дека ќе има универзитет, сателитите внатре во Владата гласаат. Анонимуси и уметници по поезија, танц и јавање ќе држат информатички предмети во Македонија“, рече Макрадули од собраниската говорница. Тој рече дека е разочаран од вицепремиерот на ДУИ, кој „преминал“ преку префиксот „македонски“ универзитет.
За Макрадули се смешни деловите од овој, како што го нарече, квазиуниверзитет, каде што се наведува дека треба да постојат методи за избор на цимери, а се предвидува и театар за студентите и вештачка лагуна со пристаниште за докови и пристап до вода!? Затоа тој на присутните пратеници им порача дека не знае од каде да почне со наведување делови од проектот кои, според него, се само за засмејување на јавноста.
„Ова е трагедија и срам што ви поминал закон за кој Владата вели дека ќе чини 1.025.000 евра, а службата го демантира тоа. Ви гарантирам дека во досието што го комплетираме како пратеничка група сите ќе одговарате кога ќе дојде времето“, им порача Макрадули на пратениците од владејачката партија. Тој оцени дека владиниот проект за универзитетот е навреда за наставниците и граѓаните во државава и предупреди дека вмровизацијата на општеството ќе има далекусежни штетни последици во Македонија.
Набројувајќи ги специфичните буџети, пратеникот на СДСМ го нагласи сочниот хонорар што бил наменет за „ортакот на Самакоски од странство“, за кого, според Макрадули, Владата одвоила 86.250 долари само за три месеци. „Тоа според вас чини нула. Или, во советодавното тело еден од тие што одлучува е амбасадорот Зоран Јолевски, а не е вклучен ниту еден од професорите на државните универзитети“, им се обрати Макрадули на пратениците од владејачката партија.
Заменик-министерот за образование, Јован Лазаров, му реплицираше на Макрадули дека не е точно дека се формира македонски универзитет за информатичка технологија, туку дека расправаат по точката за Предлог-закон за изменување и дополнување на Законот за основање универзитет за информатички технологии во Скопје, со промена на седиштето во Охрид.
Инаку, во измените и дополнувањата на проектот за основање македонски универзитет за информатички технологии, за кој зборуваше Макрадули, се наведени сите членови на Управниот одбор, меѓу кои како ректор се претставува Благоја Самакоски, а меѓу членовите на Управниот одбор е македонскиот амбасадор во САД, Зоран Јолевски. Но, за разлика од другите членови на Одборот, нивните плати се изразени во нула денари. |
