Раотинчани ја чистат тињата од домовите

ТЕТОВО - За жителите на тетовското село Раотинце, нема мир. Откако Вардар се повлече во своето корито, сега се' е насочено кон чистење на поплавените делови од 60 куќи што се најдоа под удар на стихијата. „Тињата сериозно загрижува зашто освен влага во куќите, влијаела и врз стабилноста на објектите. Тиња има навлезено и по племни, штали и други помошни простории. Сега се' се прави за да се нормализира животот. Искрено, не знаеме до кога, зашто годинава трет пат се справуваме со тешки последици од поплавата“, ни зборуваше Кирко Масевски, претседател на МЗ „Раотинце“. Неколкумина жители на ова долнополошко село ни потврдија дека интензивно се чистат поплавените простории и куќи со силен напор да се врати нормалниот живот во селото. Ваква атмосфера во изминатите два дена владееше и во соседните села Копанце и Туденце. Во Раотинце велат дека секој поинтензивен дожд внесува страв од нови поплави особено ако се совпаѓаат со испуштање поголеми количини вода од Мавровското Езеро. Во трите села останува надежта проблемот да се реши со реализација на проектот за регулација на осумте километри корито на Вардар. Инаку, вчера водите на Вардар беа за еден метар пониски од нивото кога се разлеваат. Оваа состојба е како резултат на тоа што претходните три-четири дена немаше нови врнежи. Во трите привардарски села во Долнополошко под вода беа околу 90 објекти за живеење. Нивните сопственици очекуваат Владата да се огласи со доделување првична помош и повторно да помине комисија за процена на штетите. Се надеваат и на ветувањата дека ќе им бидат исплатени проценетите штети од претходните поплави, кои вкупно изнесуваа околу 19 милиони денари. (Г.Е.)