Битолската зоолошка под клуч?

Ако на градината и' се стави катанец, над триста станари ќе мора да се селат во Скопската зоолошка

Битола - Ќе се затвора ли Зоолошката градина во Битола!? Со вакви стравувања во последниве денови живеат вработените во Зоолошката откако Ветеринарниот инспекторат, наводно, утврдил дека условите за згрижување на животните и на птиците се крајно очајни и надвор од сите стандарди. Главниот проблем е што и по шест децении од отворањето, Зоолошката во Битола, која се протега на 2,2 хектара под Тумбе-кафе, е дивоградба, а во неа досега никој не посакал да инвестира ниту една цигла.

Раководството на паркот тврди дека засега во Битола нема стигнато официјално решение што констатирала инспекцијата и дали на Зоолошката и' се заканува клуч, иако не е исклучена и таа можност доколку во догледно време не се подобрат состојбите.

Зошто по цели 60 години, најмалата зоолошка градина во Европа сместена под Тумбе-кафе не може да ги исполни европските стандарди за згрижување за животните и на птиците? Зошто наместо осовременување и проширување, паркот се донесе на ова дереџе? Зошто Општината не и' подаде рака на оваа институција? Ова се само дел од прашањата на кои вработените во паркот бараат одговор од државата и од Општината.

Ако на градината и' се стави катанец, над триста станари во паркот ќе мора да се селат во скопската Зоолошка градина, а без егзистенција остануваат девет постојано вработени и уште десетина работници на определено време.

Вработени од паркот, кои не сакаат јавно да зборуваат, велат дека решението за затворање на зоолошката ќе следува многу скоро. Според нив, ветеринарни инспектори констатирале дека во градината ги нема потребните услови за престој на животните. Нема решенија за канализација за отпадните води, целата инфраструктура е стара, кафезите се тесни или претесни за сместување на животните и имаат силна реа. Животните се инцидентно сместени, без логичен редослед. Живеалиштата не се безбедни за посетителите, особено за децата. Но, ниту животните не се безбедни од посетителите. Битолчани се сеќаваат дека единствениот алигатор во градината пцовиса откако несовесен посетител со прачка му ги избоде очите. Во зоолошката нема соодветен кадар. Нема вработен ветеринар, тој се повикува по потреба, нема биолог, а нема ни едукативен центар. „Неколку недели сме загрижени и во неизвеснот дали ќе се затвори Зоолошката и што ќе биде со нас. Градината со години е оставена на милост и немилост на државата. Толку години сум на работа, а не паметам нешто посериозно да се вложило во неа. Едвај со донации и наши средства раководството успеа да реконструира неколку кафези, но тоа не е доволно“, велат загрижени работници од Зоолошката.

За да биде ситуацијата подраматична, минатата недела силниот ветер откорна два покрива на живеалишта во паркот што беа од тврда градба. Но, за среќа, немаше повредени животни.

Каква ќе биде судбината на Зоолошката градина во Битола е проблем што го загрижува и раководството на паркот. Директорот Коста Нешковски неделава беше во Скопје за да ги добие сите информации што понатаму со Зоолошката во Битола. „Немаме се' уште документ кој е заклучокот од Ветерниранта инспекција, но се знае дека условите не се онакви какви што треба да бидат. Ова е наследена состојба. Меѓутоа, веруваме дека не' чекаат подобри времиња, бидејќи зоолошката е влезена во ДУП за Тумбе-кафе“, рече Нешковски, кој на чело на оваа инсти��уција е шест месеци.

Според екологистите, постојат причини и за и против затворање на Зоолошката во Битола. Нешат Аземовски од Граѓанската асоцијација „Бисфера“ вели дека оваа зоолошка е значајна, бидејќи е единствена на потегот Скопје - Солун. „Ако не се променат условите за престој и живеење на животните согласно со европските директиви, Македонија ќе биде обврзана да ја затвори зоолошката или да ја пренамени со локални видови животни што би имале соодветни услови за живот. Значи, ќе имаме волк, лисица и мечка, но никако тигар, лав или други егзотични животни. Во тој случај, таа би ја загубила атрактивноста за посетителите“, вели Аземовски.

Единствената атракција што пред неколку години им ја приреди зоолошката градина на битолчани беше трката со магариња. (А.Б.)