Еден ден пред празникот, а по пет неуспешни обиди, велешкиот суд, конечно, доби нов претседател. На последната седница на Судскиот совет, која се одржа по три месеци пауза, за раководител на велешкиот суд е избран поранешниот претседател Јордан Лазаров.

Струмичкиот суд и по последниот, којзнае по кој ред оглас, и натаму останува со в.д претседател, бидејќи на последните шест конкурси не се јавува ниту еден од судиите. Нов претседател не доби ни радовишкиот Основен суд, бидејќи ниту еден од двајцата пријавени кандидати не го доби потребното двотретинско мнозинство, односно 10 гласа од 15 члена на Советот.

Најголем интерес, сепак, предизвика изборот на двајца судии во скопскиот Апелационен суд. Од 40-ина пријавени кандидати, од кои 11 добија поддршка за втор круг, потребното мнозинство го доби само судијката од Основен суд -Скопје 2, Јованка Никодиновска, која го доби максималниот број гласови од сите петнаесет члена на Советот.

Советот избра и тројца судии во Управниот суд, а тоа се: Едита Насковска, Виолета Богоевска и Радица Василевска. Битолски апелационен судија стана Аце Бакиевски, а четири нови судии доби и Основниот суд во Битола - Хаџо Тариќ, Љупчо Савески, Снежана Дојчиновска и Ристо Сотиров. За судија во струшкиот суд, пак, беше избран кандидатот Севди Каба.

Од шеесетмина пријавени кандидати за Основниот суд во Скопје 1, потребната поддршка ја доби само кандидатот од малцинските заедници Хамди Рефет Бафтијари, за кого беше спроведено двојно гласање. (Г.Д.)