Претходен број

Батко Ѓорѓија се врати на кумановскиот плоштад

Вчера на централниот градски плоштад во Куманово повторно се врати бронзената статуа на познатиот кумановски шегобиец Батко Ѓорѓија, кој со своите кафеански мераклаци и хумористични досетки ја занимавал генерацијата кумановци од средината на 19 век. Познато е дека првата верзија на бронзената статуа, што не им беше по волја на дел од кумановската културна јавност и на чаршијата, беше урната од „непознати сторители“ пред една и пол година, само по нецела година од поставувањето, по што академскиот вајар Русе Андоновски изработи нова, која вчера беше поставена на истиот постамент во центарот на градот. Иницијативата на актуелната општинска власт, на чело со градоначалникот Зоран Дамјановски, да се овековечи кумановскиот втор Итар Пејо наиде на општо задоволство во Куманово со оглед дека Батко Ѓоргија за нив е синоним за безгрижен живот и ведар дух овековечен и со познатата песна за него во која се вели дека „све што видеја убаво во село, све е сакаја да е његово!“, а особено бил лаком „за арни волови и за убаве невесте“, ама на крајот „умреја Батко Ѓорѓија за едну чашу ракија!“ (Ст. Б.)