Пристигаат првите донации за Бигорски

Снежана Калабакова

Владата ќе додели еднократна парична помош во висина од 10 илјади евра за монашкото братство од манастирот „Свети Јован Бигорски“. Исто толкава сума и плус комуникациска опрема и бела техника ќе донира и мобилниот оператор „Космофон“, кој вчера го отвори и специјалниот телефонски број за донации 075 143 444 на кој сите заинтересирани со едно јавување или СМС-порака ќе можат да донираат по 100 денари.

Здружението на македонските копаничари вчера ја понуди својата стручност и работа при возобновувањето на манастирот. Кон донациите со помош од 500 илјади денари се придружи и АД „Фершпед“, додека сопственикот на синџирот маркети „Тинекс“, Владимир Тодоровиќ, донира 80 пакети прехранбени производи и разни хигиенски средства. Владиниот портпарол Мартин Мартиновски информира дека Владата ги задолжила надлежните институции да почнат со проекти за реставрација на уништените манастирски делови.

На Владината седница било одлучено Комисијата за односи со верските заедници да отвори посебна жиро-сметка за донирање. Со апел за помош се јави монашкото братство на манастирот, кое веќе отвори денарска и девизна жиро-сметка и телефонски број на кој граѓаните можат да донираат. Телефонот за донација е 143 444 на трите мобилни оператори со предзнак 070 за корисниците на „Т-мобиле“, 075 за „Космофон“ и 077 за корисниците на ВИП. Денарската жиро-сметка гласи: МПЦ Дебарско-кичевска епархија Бигорски манастир „Свети Јован Крстител“ 500-000000-3835-65 Депонент: Стопанска банка АД - Битола. Покрај денарската, отворена е и девизна жиро-сметка: МПЦ Дебарско-кичевска епархија Бигорски манастир „Свети Јован Крстител“ ИБАН МК07500701000133139, а депонент е Стопанска банка АД Битола СВИФТ СТББМК22.