Сликите од пожарот го шокираа ктиторот

Со донацијата на Костовски од половина милион евра е направен новиот дел од конаците

Билјана Ангеловска


„Шокантно. Тоа што го видов навистина многу ме растревожи. Сигурен сум дека сликите од остатоците од изгорениот манастир ги погодуваат сите. Многу жалам за тоа што се случи, немам зборови“, потресено ни изјави Трифун Костовски, ктитор на возобновениот дел од конаците на манастирот „Свети Јован Бигорски“

Пеплосаните делови од манастирот навистина будат чувство на огромна загуба кај секој граѓани на Македонија. Се чини сосем е разбирлива тагата кај Костовски, кој пред четири години донираше околу половина милион евра во „Бигорски“. Со тие средства е направен новиот дел од конаците на најубавиот манастир во државава.

„Како господ да го штител тој дел, па не е зафатен со пожарот. Радосен сум за ’мојот‘ дел, за црквата, за непроценливиот иконостас, што останаа неоштетени. Но, сепак, се' е тоа дел од манастирскиот комплекс и загубата е преголема. Тажно е што ги нема веќе тие прекрасни одаи. Повеќе од мачна е самата помисла што се случи“, вели Костовски.

Не сакајќи директно никого да обвинува за пожарот и последиците од него, сепак, прстот го вперува кон институциите на државата, кои, како што вели, покажале негрижа за ова наше национално богатство. Манастирот е стар објект кој бара постојани интервенции од страна на државата, редовни контроли на сите инсталации за да се избегне тоа што се случи.

„Монасите кои живеат таму најмалку се виновни за несреќата. Тоа се добри луѓе, домаќини што се грижат за комплексот. Но, вината ја гледам во државата. Ова е национално богатство и заслужува многу подобар третман. За жал, манастирите се оставени буквално во рацете на МПЦ, без никаков стручен надзор и можност за да се согледаат одредени недостатоци и да можат навреме да се санираат“, констатира Костовски.

Според него, во секој споменик на културното наследство мора да има систем на контрола, а не да биде оставен на монасите кои целиот свој живот го посветиле на манастирот. Во случајот со „Свети Јован Крстител“ затаи општеството.

Трифун Костовски е познат како вљубеник во македонското национално богатство. Можеби затоа и уште повеќе луѓето го познаваат како голем донатор за возобновување, реставрирање и опремување бројни историско-национални и културни објекти. Од тие причини, граѓаните веројатно очекуваат сега тој повторно да даде свој придонес за манастирскиот комплекс покрај Радика да си го поврати сјајот.

„Со сето срце би помогнал повторно и би сакал да бида�� вклучен во возобновувањето на манастирот. Но, онака како што мислам дека треба да се направи тоа. Со отворање жиро-сметка, може да се помогне, но нема да биде доволно, бидејќи тоа е сложена работа. Сепак, пред се', прво треба да закрепнам финансиски, а потоа да учествувам во една ваква благородна работа“, вели Трифун Костовски.