Откорната плочата на бранителите кај Карпалак

По шести пат е осквернавено обележјето за бранителите во месноста Карпалак на автопатот Тетово - Скопје

ТЕТОВО - Обележјето за бранителите во месноста Карпалак на автопатот Тетово - Скопје е осквернавено по шести пат. Според општинскиот разгранок на „Достоинство“ - Тетово, плочата, поставена на бетонска подлога на банкината, била откорната од своето лежиште. На неа се наоѓаа испишани имињата на десеттемина бранители од Прилеп убиени на 8 август 2001 година од припадници на тогашната ОНА, кога се движеле кон Тетово.

Марин Најдов, претседател на разгранокот на „Достоинство“, вели дека вандализмот се случил ноќта меѓу петокот и саботата. „Министрите Гордана Јанкуловска и Зоран Коњановски уште по петтото сквернавење ветија дека нема повеќе да се случуваат вакви работи. Меѓутоа, вандалите повторно го направија своето. Сигурен сум дека министерствата за внатрешни работи и за одбрана имаат сознанија за сторителите. Овој пат ги повикувам во најкус рок да ги преземат сите мерки за пронаоѓање на сторителите. Тоа е нивна обврска од јавно искажаниот збор и даденото ветување пред македонската јавност“, рече Марин Најдов.

Сквернавењето на плочата на Карпалак не е единственото. Обележјето кај Вејце посветено на осумтемина загинати бранители набргу по поставувањето беше парчосано, а она кај Гајре сосема исчезна. (Г.Е.)