Пари од тужба во хуманитарни цели

Три институции за згрижување деца ќе добијат по 10 илјади евра од премиерот Никола Груевски, кој одлучил да ја донира во хуманитарни цели отштетата што ја доби од судскиот спор против професорот Љубомир Фрчкоски.

Вкупната отштета од тужбата за клевета против Фрчкоски изнесува 30 илјади евра, кои ќе им биле поделени на Домот за деца без родители „11 Октомври“, Центарот за деца со церебрална парализа и Домот за доенчиња во Битола.

Груевски вчера го посети Домот „11 Октомври“, каде што донираше новогодишни пакетчиња и компјутери. „Парите што ни ги даде премиерот годинава ќе ги насочиме за реновирање девет кујни и за нов начин на организација на нашата работа, така што ќе имаме девет воспитни групи“, рече Оливера Јовиќевиќ, раководителка на служба во Домот.

Покрај премиерот Груевски, децата ги посетија и министрите за внатрешни работи и за труд и социјална политика, Гордана Јанкуловска и Џељаљ Бајрами, и заменик-министерот за труд и социјална политика, Спиро Ристовски. (П.Р.)