Недостигот од храна да не служи за политички притисок
Рим - .Земјите-учеснички во ФАО на Конференцијата во Рим презедоа одговорност до 2015 година да го намалат на половина бројот на гладните во светот. Ова е дел од Декларацијата усвоена на пленарната седница на Конференцијата на Организацијата на ОН за храна и земјоделство (ФАО) во Рим на која учествуваа делегации на 183 земји.
Во Декларацијата се истакнува неопходноста да бидат укинати трговските бариери и да се зголеми производството на земјоделски стоки, за да се надмине растечкиот недостиг од храна, чиишто последици негативно се одразуваат и на сиромашните и на богатите земји во светот.
Во документот се истакнува дека се неопходни неодложни мерки за да се запре зголемувањето на цените на прехранбените производи и оти е недозволиво проблемите со храната да се користат како инструмент за политички притисок.
Претставници на повеќе латиноамерикански држави, како на пример Куба, Аргентина и Венецуела, изразија несогласување со текстот. (МИА) |
