Се бараат Турција, Шпанија, Бугарија и Хрватска
На Македонија и' е потребен посериозен пристап кон туризмот и активна промоција на домашните туристички капацитети, сметаат туристичките работници. Вчера, денеска и утре пред трговскиот центар „Рамстор“ претставници од туристичките агенции во земјава ги промовираат своите понуди.
Според Ангел Иванов, претседател на Туристичкиот сојуз на Скопје, туризмот треба да се сфати како сериозна дејност, бидејќи во светот се третира како трета најважна стопанска гранка. „Додека Македонија не го осмисли тоа посериозно и не формира Министерство за туризам, секогаш ќе има некои приватни и лични иницијативи кои нема да дадат сериозен плод. Верувам дека само министерство за туризам ќе направи нешто посебно“, рече Иванов.
Според него, годинава е веќе доцна да се почне со промовирање на земјава како туристичка локација, бидејќи агенциите веќе ги комплетирале своите понуди, а многумина од туристите веќе ги испланирале годишните одмори.
За македонските туристи најатрактивни локации за годишен одмор се Турција, Бугарија, Шпанија, Црна Гора и Хрватска. Аранжманите се со почетни цени од 100 евра. Според туристичките работници, Грција не е актуелна како минатата година. Според Иванов, интересот за Грција е за три четвртини помал од минатата година. (А.П.) |
