До 2013 ќе си ги плаќаме ќесите за пазарење

До јануари 2013 година останува во сила одлуката нееколошките пластични ќеси, со кои сега пазаруваме во маркетите, да се наплатуваат. Дури по две години тие ќе се заменат со биоразградливи, кои се направени од ист материјал, но имаат неколкупати помал век на распаѓање. Биоразградливите ќеси нема да се продаваат, туку, како порано, бесплатно ќе се делат во маркетите, заедно со хартиените ќеси од рециклирана хартија и платнените торби. Најновата мерка е нов начин да се избегне масовната употреба на пластични ќеси што беше незабележително намалено откако е почнаа да се наплатуваат. Оваа одлука, на предлог од Министерството за животна средина, ја усвои Владата на својата последна седница.

До почетокот на 2013 година производителите на пластични ќеси, информираат од Министерството, треба да се подготват за производство на биоразградливите ќеси. Тие се направени од полиетилен со додаток на посебни адитиви што овозможуваат намалувањ�� на времето на распаѓање на шест до осум месеци. Производителите ќе имаат обврска да ги сертифицираат своите производи и да гарантираат дека се биоразградливи, односно дека помалку ја загадуваат животната средина. Маркетите, велат од Министерството, ќе можат да нудат и хартиена ќеса како втора опција, но направена исклучително од рециклирана хартија. Од Екологија нагласуваат дека остануваат на ставот дека не препорачуваат масовно производство и потрошувачка на хартиени ќеси поради уништувањето на шумскиот фонд. За нив најдобра опција се платнените торби што можат многупати да се употребат и имаат долг век на траење. (С.Н.)