Грција ги добива битките против македонското вино

Од почетокот на 2011 Европа нема да ја спушти рампата за нашето вино, но никој не кажува како ќе се извезува тоа

Македонското вино ги губи битките на сите полиња. Ембаргото за извоз во Европската унија продолжува, па на големо се повлекува виното од маркетите, се забранува неговата дистрибуција и пласман. Иако наша владина делегација деновиве отпатува во Брисел во Европската комисија за да преговара за укинување на бариерите за извоз на нашето вино на европскиот пазар, напредок не е постигнат. Делегацијата од Министерството за земјоделство, предводена од заменик-министерот Перица Ивановски, донесе вести дека од почетокот на наредната година Европа нема да ја спушти рампата за македонското вино и дека продолжуваат разговорите за решавање на проблемот, но не донесе информација како ќе реализира тоа во практика. „Некои македонски вина имаат проблем да се извезуваат, посебно брендовите кои во името на виното го содржат терминот ’македонски‘, но тоа не значи дека целото вино што се извезува има проблем“, објаснува Ивановски. На разговорите во Брисел нашите претставници предложиле терминот „македонско“ да можат да го користат и Грција и Македонија, но притоа да се направи дистникција од која земја потекнува, со можност за користење на друг хомоним.

„На пример, на грчките вина стои Тракија, а на бугарските Тракиска Низина. Такво нешто може да направиме и ние и Грција со македонските вина“, вели Ивановски.

Според сегашната состојба, македонското вино во Европа ќе може да се продава само со етикети на кои нема географски опис на регионот каде се произведува. И покрај смирувачките ноти на нашите официјални власти д��ка глобално македонското вино нема проблем да се пласира надвор, факт е дека проблем постои и дека за да се надмине тој, винарниците треба да го сменат името на виното, што ќе значи нови етикети и нови трошоци.

Грчките производители на вино од северот на Грција веќе на големо тераат кампања и побараа во Германија да може да се пласира само македонско вино од Грција, а не и македонско вино од Македонија. Доколку не се спроведе тоа нивно барање, се закануваат со тужби против дистрибутерите и супермаркетите во Германија, кои ќе продолжат да го продаваат виното од земјава со ознака македонско. Здружението ги најавува тужбите со образложение дека терминот „македоникос“ уште пред 20 години го заштитила Грција во Европскиот регистар и затоа тврдат дека само грчките винарски визби имаат право да го користат терминот „македонско“.

Јанис Војацис за грчкиот сајт АНА-МПА вели дека маркетите што ги почитуваат европските права ги отстраниле за нив спорните вина, а останатите што не го сториле тоа, ќе се соочат со тужба. Војацис додава дека офанзивата е зголемена. Алармирани биле сите амбасади во Европа, со цел да се спречи, како што изјавува, крадење бренд.

Во изминатите неколку месеци Грците дејствуваа на терен при што покрај Германија, успеаја да забранат продажба на македонско вино и во Словенија, каде што беа повлечени од продажба четири вина. (А.С.)