Инвестициите во згради и во споменици не носат раст

Инвестициите во згради и во споменици нема да и' донесат економски раст на земјава, обвини вчера опозицијата на вториот ден од расправата во Собранието на Македонија, по предлог-буџетот за 2011 година.

Тие сметаат дека предложениот буџет е само пуст список на желби, неразвоен и нема да придонесе за намалување на сиромаштијата, невработеноста, ниту за подобрување на состојбата во стопанството, транспортот и здравството.

Според Никола Ќуркчиев од СДСМ, наредната година цела држава ќе биде заложник на трошењето пари за „мегаломанскиот проект ’Скопје 2014‘“, а ќе нема пари за решавање на најгорливите проблеми.

Според Ристо Пенов од ЛДП, буџетот на македонските стопанственици ќе им донесе дополнително оптоварување од 130 милиони евра, а за возврат тие ќе добијат само канцеларии за функционери и службеници од проектот „2014“. Игор Ивановски од СДСМ смета дека следната година нема да се оствари проектираната висина на приходите што ќе повлече еден или два ребаланса.

„Како може да остварите раст од 3,5 проценти со инвестирање во згради, а нема ниту една продуктивна инвестиција во гасификацијата, во изградбата на автопати, во енергетските објекти?“, праша Ивановски. За да ги негира тврдењата на опозицијата министерот за финансии, Зоран Ставрески, ја прочита уште еднаш оцената на генералниот директор на ММФ, според кој, Македонија има здрави економски политики.

„Одговор за тоа дали буџетот е реален, дали фискалната политика е добро поставена, дали стабилноста и проекциите се реални и можни ви дава фактот што ММФ и' одобри 480 милиони евра на Македонија. Зарем ММФ би го направил тоа, ако има разлики во однос на проекциите“, порача Ставрески. (Ек.Р.)