Конференцијата за НАТО била успех, а не дебакл

Министерството за надворешни работи ги демантираше тврдењата на пратеникот на СДСМ, Горан Минчев, дека НАТО-конференцијата во Битола била „дебакл од протокаларен аспект“ на која „не се појавиле високи претставници од земјите во регионот“.

„Не полемизирајќи околу капацитетот на пратеникот Минчев во оценувањето на успешноста и дипломатскиот бенефит од организирањето на Конференцијата, МНР укажува дека таа беше исклучително успешно организиран настан, во однос на актуелноста на темата и од аспект на нивото на учеството, се наведува во реакцијата.

Притоа се укажува и дека наспроти тврдењата на Минчев, на Конференцијата во Битола присуствуваа министрите за одбрана на Албанија, Хрватска, Словенија, Љубица Јелушиќ и на Турција, замениците-министри за одбрана на Босна и Херцеговина и на Црна Гора, претставници од регионалниот Центар за безбедносна соработка РАКВИАК, претставници од Седиштето на НАТО во Брисел и Командата на Алијансата во Неапол, како и амбасадори на земјите-членки на НАТО во Македонија.

„Ваквите неиздржани, неосновани и паушални оцени ги разбираме како уште неуспешен обид да се девалвираат активностите на Македонија насочени кон зачленување во Алијансата, како и придонесот и посветеноста на земјата кон евроатлантската интеграција на регионот во целина“, стои во реакцијата од МНР.

Министерство за одбрана, исто така, ги отфрли како неосновани конструкции тврдењата на Минчев за непотребно расфрлање буџетски средства на конференцијата во Битола. Тоа, според Министерството, е ноторна лага и ги отфрла обвинувањата дека Бојан Ефтимов има земено пари за неговиот ангажман во организацијата на Регионалната конференција.

„Такви лица имаше од Скопје и од Битола, кои работеа без никаков надомест. Не треба да се кажува дека Бојан Ефтимов потрошил 28.000 евра во Битола, чиј целокупен ангажман бил во промоција на МО“, рече министерот за одбрана, Зоран Коњановски. (МИА)