Преговарајте, не чекајте спас од горе

Чешкиот претседател не ја знае адресата во ЕУ каде што би дал совет како да се реши проблемот со Македонија

Тамара Грнчароска



Светот, Европа и земјите од регионот имаат низа поважни прашања, така што спор за име што си го избрала самата држава мене ми се чини сосема недостоен, е оцена на чешкиот претседател Вацлав Клаус, кој од вчера престојува во дводневна официјална посета на Македонија. Според Клаус, треба да се преговара за решение, „но да се чека на спасение одозгора, тоа не е можно“. „Не е можно да се примени решение однадвор со кое не би се согласиле граѓаните на двете држави“, смета чешкиот претседател.

Претседателот Ѓорге Иванов, пак, го радува тоа што во последно време се интензивирала комуникација меѓу премиерите на Македонија и на Грција, што значи дека се враќа довербата меѓу раководствата на двете држави. „Но, сепак, решението мора да го најдеме во рамките на ОН, каде што се водат овие долги разговори“, рече Иванов. Според него, не е потребна лидерска средба за да се постигне консензус за спорот во земјата, бидејќи процесот се води во ��Н и оттаму се очекува предлог од Нимиц. „Кога ќе дојде таков предлог, тогаш треба да го хомогенизираме општеството и да дојдеме до заеднички став“, изјави тој. Се' додека не се добие она што е официјална постапка во ОН, нема за што да се разговара, е став на Иванов.

Иванов рече дека Македонија е подготвена да се дојде до решение кое ќе биде заемно прифатливо и кое нема да посегнува по нашиот идентитет, јазик и достоинство. Иванов потенцираше дека треба да се најде нешто што ќе биде заемно прифатливо за двете држави, нешто што треба да го прифатат и граѓаните од двете држави, бидејќи во спротивно, тоа ќе создаде дополнителни проблеми. „Ние сме подготвени да дојдеме до такво решение“, изјави македонскиот претседател.

Одговарајќи на новинарско прашање како да реагира Европа во случај кога влегувањето на една држава во ЕУ е спречено од билатерално прашање, Клаус рече дека тој нема смелост да ја советува Европа. „Не знам кого да советувам во таков случај. Дали тоа да биде претседателот на ЕУ или на ЕК. Дали тоа да бидат двете доминантни држави, кои ја определуваат политиката во Унијата - Франција и Германија, или би требало да мислам дека ЕУ е се' уште заедница на суверени држави, кои соработуваат заедно, па ако тоа е вистина, во таков случај би требало да и' дадам совети на Грција. Во таков случај претпочитувам никому да не му давам совети“, рече Клаус.

Чешкиот претседател, кој е деклариран евроскептик, вчера проговори и за кризата во Грција и за турбуленциите околу еврото. Според него, како што се покажало, еврото може да функционира само во убаво време, додека „на првото невреме“ се покажа дека заедничката валута не е соодветна. Тој вели дека ова што се случи со Грција е само логичен исход од тоа и работите на тој план се' уште не се завршени.

Двајцата претседатели вчера заемно ги потврдија добрите политички и економски односи меѓу двете земји, при што Иванов ја посочи Чешка како пример од кој Македонија учи, но и применува искуство во реформирањето на својот општествен систем. Клаус возвратно порача дека со посетата се дава и јасна поддршка од Чешка на аспирациите на Македонија во европските структури.

Двајцата претседатели денеска ќе учествуваат на македонско-чешкиот бизнис-форум на кој ќе се формира и македонско-чешки бизнис- совет. Клаус вчера оствари средба и со премиерот Никола Груевски и го посети македонското Собрание. Најавена е и средба и со експретседателот Бранко Црвенковски, со претставници на верските заедници и со градоначалниците на Скопје, Сарај и на Тетово.