Поглед

Велосипед на синџир

Сања Наумовска

Пролетта одамна мина и летото полека ќе замине, а скопјани никако да се повозат на најмен велосипед. Најавениот проект на Град Скопје нема абер од реализација, иако измина еден месец откако е одредена и цената за најмување. По се' изгледа донираните сто велосипеди ќе останат врзани на синџир.

Градските власти неодамна распишаа тендер за набавка на натстрешници за паркиралиштата за велосипедите и тоа приближно е се' што е направено за јуни. Како да знаеја дека овие еколошки превозни средства ќе останат паркирани подолго време. Иако сезоната за возење велосипед во Скопје ќе трае уште најмалку пет месеци, сепак, ако реализацијата на проектот продолжи со ова темпо, на велосипед ќе седнеме најрано идната година.

А, остануваат уште многу работи да се осмислат. Се' уште не се знае ни како ќе се плаќа, ни каде ќе има паркинзи за најмување. Не е познато ниту како и колку податоци ќе треба да остават граѓаните при најмувањето и какви санкции ќе има за оние несовесни корисници што ќе ги оштетат велосипедите.

Засега, од Градот Скопје не соопштуваат никаква конкретна идеја како и кога проектот ќе се реализира пред граѓаните. Остануваат само на хартија заложбите за здрава животна средина, алтернативен јавен превоз, стимулирање на младите да користат велосипед место автомобил...

Но, затоа, пак, скопските власти пред медиумите соопштија дека ќе ги искористат искуствата од Брисел. Кои искуства не кажаа, но јасно е дека не само во Брисел, туку и во многу други европски градови што имаат долга традиција на употреба на велосипедите како јавен превоз има што да се научи. Значи, многу размислување не е потребно.