Возачот на Тоше ангажира нов адвокат
Судењето на Ѓорги Ѓоргиевски, возачот на поп-пејачот Тоше Проески, вчера не се одржа и покрај присуството на сите повикани. Одложувањето на овој судски процес уследи откако Ѓоргиевски го извести судот дека само еден ден порано ги откажал услугите на досегашниот негов бранител и дека во натамошниот тек од судската постапка неговите интереси ќе ги застапува адвокатката Силвија Џилвиџиева.Таа побара од судот краток период за запознавање со предметот. Судот го прифати барањето и донесе одлука следното рочиште да го презакаже за в понеделник.
Во судницата вчера покрај застапникот на семејството Проески, неколкуте вешти лица и сведоци, се појави и менаџерката на трагично загинатиот Проески, Лилјана Петровиќ. За неа судот предложи распит, но новоангажираната бранителка на Ѓоргиевски побара таа да биде сослушана во редовна постапка, односно на следното закажано рочиште. (Љ.С.) |
