Акварели на Кончалиев во чест на Белогаски
По повод одбележувањето на 100-годишнината од раѓањето на академскиот сликар Љубомир Белогаски и 20 години од формирањето на Галеријата при Музејот на град Скопје што го носи неговото име, вечерва во 20 часот во Галеријата ќе биде отворена самостојната изложба на ликовниот уметник Бранко Кончалиев од Струмица.
Ова е трета изложба на д��машни современи автори организирана во сеќавање и пиетет кон личноста и делото на Белогаски, врвниот мајстор на акварелот, на која Кончалиев ќе се претстави со 20 акварели. Делата се со различни мотиви и засебен ликовен јазик и пристап во третирањето на оваа ликовна техника.
Бранко Кончалиев, кој живее и работи во Струмица, се смета за еден од ретките автори што останале доследно верни на акварелот, за што говори и фактот на негово долгогодишно негување на оваа ликовна техника.
Роден е во 1949 година, дипломирал во 1970 година на Педагошката академија во Скопје, а како ликовен педагог работел 38 години во средни и основни училишта. Досега реализирал 15 самостојни и над 50 групни изложби. Учесник е во работата на повеќе локални и меѓународни ликовни колонии во земјата и странство. Член е на ДЛУС од 1976 година. (К.Б.) |
