„Биоскопија“ - нов албум на Елена Христова и Горан Трајкоски
Новиот проект на двајцата истакнати музичари излезе под капата на „Скопски џез-фестивал“
Вокалистката на етно-групата „Баклава“, Елена Христова и Горан Трајкоски (вокалистот на екс „Анастасија“, „Мизар“, „Падот на Византија“), направија заеднички албум, кој го потпишуваат под име��о „Биоскопија“. Вчера во артклубот „Менада“, ова звучно парче на двајцата истакнати македонски музичари издадено под капата на „Скопскиот џез-фестивал“, ја доживеа својата промоција.
„Биоскопија“ носи 14 композиции, традиционални македонски, испеани од Елена Христова, која го направи и изборот, а нивниот автентичен аранжман е на Трајкоски.
„Композициите сместени на албумот се на Елена. Таа одамна ги имала во својата ’фиока‘, и веќе беа испеани во демо верзија. Ми ги даде во форма на мп3, и јас потоа така ги работев, врз база на нејзиниот глас. Се разбира, за потребите на снимањето на албумот потоа беа препеани. За да ги спакувам во некој формат ги менував и ритмички и хармонски“, вели Горан Трајкоски.
На албумот „Биоскопија“ гостуваат Марија Ѓаковска - виолина, Игор Василев - Новоградска - контрабас, Дејан Теодосиевски - виолончело и Анастасиј Јоану - кларинет. Снимен е во студиото „Тра-ла-ла“, а дизајнот на опаковката е на Деан и Љубиша Петровски. (Т.И.) |
