Владата ќе го спасува домашниот ориз

За увоз на килограм мора да се откупат четири килограми домашен ориз

Секој што ќе сака во иднина да увезе ориз ќе мора претходно да купи домашен ориз и тоа во четири пати поголема количина од онаа што има намера да ја увезе. Поточно увозот на ориз се врзува со откупот на ориз од родот од 2010 година од домашно производство, при што за секој увезен килограм ориз увозниците ќе треба да откупат четири килограми домашен.

Оваа мерка Владата ја усвои на својата последна седница, на барање на Министерството за земјоделство, а има цел да го заштити домашното производство на ориз.

„Оваа одлука се донесува поради опасност од нарушување на пазарот, како и за загрозување на целите на националната земјоделска политика“, соопштуваат од Министерството за земјоделство.

Оризот во вкупната површина под житни култури учествува со околу три отсто. Производството на ориз во земјава има долга традиција на одг��едување. Неговото значење е многукратно, бидејќи е извозно ориентиран и ангажира многубројна работна сила во производството и во доработката. Предвидено е производството на оризовата арпа, од која подоцна се произведува бел ориз, годинава да достигне 23.100 тони, што е за 2.000 тони повеќе од лани. При доработката на оризовата арпа се очекува од годинешниов род да се добие вкупно производство од околу 12.700 тони бел ориз. Потребите од бел ориз во земјата на ниво на економска година изнесуваат вкупно 8.500 тони, од кои за исхрана на населението се користат 6.500 тони, а за репродукција околу 2.000 тони.

Претходно Владата на барање на Министерството за земјоделство донесе слична мерка на условување на увозот на брашно и на пченица со купување домашна пченица, со што успеа да го стабилизира пазарот на пченица. (Ек.Р.)