Ќе се освојуваат инвеститори од Индија и од Кина

Освојување на пазарите во брзорастечките економии, како што се Кина, Индија, Северна Африка и Блискиот Исток. Тоа е новиот предизвик за членовите на Советот на странски инвеститори, кои вчера во Стопанската комора на Македонија избраа нов претседател.

На оваа функција, наместо Георг Валднер од претходното раководство на „ЕВН Македонија“, доаѓа Џефри Колин од „Џонсон Мети“. Негов заменик ќе биде Денис Корниенко од „Скопски легури“.

„Еден од нашите главни предизвици во наредниот период ќе биде привлекување повеќе странски инвестиции, не само од Европа, туку и од Кина, Индија, Азија и Северна Африка и тоа ќе го правиме со помош на Агенцијата за странски инвестиции. Ќе се фокусираме и на зголемување на извозот на европскиот, како и на другите подалечни пазари“, изјави Колин, по вчерашното назначување на функцијата, на која ќе биде во наредните четири години.

Инаку, Советот на странски инвеститори е тело во рамки на Комората и во него членуваат претставници од компании со доминантен странски капитал. Моментно брои околу 170 члена. Наредните седници, за разлика од досегашните, ќе бидат отворени за присуство на медиумите. (М.Т.)