И данок од денар мора да се плати

Доплатувањето на данокот од еден или два денара е доказ дека обврзникот ги исполнил обврските кон државата

Александрија Стевковска

Деновиве Управата за јавни приходи масовно им соопштува на даночните обврзници, преку писма, дека треба да си ја исполнат својата граѓанска должност и да си доплатат данок на персоналецот за 2009 година. Она што е интересно е дека и годинава продолжува традицијата државата да бара доплатување на персоналниот данок од само неколку денари, па најчесто во игра се еден, два или три денари. Оваа обврска, иако станува збор за занемарливи суми, граѓаните ќе мора да ја испочитуваат и да си ги платат, бидејќи тоа е доказ дека ги исполниле даночните обврски кон државата по основа на приходи за таа година.

Неофицијално дознаваме дека УЈП по основа на доплата од еден или два денара им испратила даночни решенија на 180.000 граѓани. Тоа значи дека од тие решенија државата ќе собере 180.000 денари, доколку станува збор за барање за доплата од еден денар или 360.000 денари ако има побарување да се доплати два денара.

Се поставува прашањето каде е тука есапот на државата и кој најмногу заработува од ваквите акции на испраќање писмени известувања за доплатување минимални суми данок. Дали најмногу заработува поштата каде што УЈП треба да плати поштарина или, пак, банките, кои земаат провизија за секоја уплатница, па макар сумата што треба да се плати да е еден или два денара. Во секој случај, во ќар не е УЈП, која мора да плати за пликовите кои ги користи и кои чинат околу еден денар на големо, а често толку чини и сумата што даночниот обврзник треба да ја доплати.

Граѓаните се збунети. Велат дека не им се исплатува да ги трошат пенчињата на чевлите за да одат до банка да ја платат сумата што УЈП им ја бара за доплата.

„Јас навистина не разбирам како на УЈП и' се исплатува да испраќа писма со барање за доплата од еден денар, кога трошокот за испраќање на тоа писмо е многу поголема од таа сума. Така беше и минатата година, така е и оваа. И сега јас треба цела машинерија да ја придвижам, да одам во банка и да чекам ред за да платам еден денар. Тоа, благо кажано, е нехумано“, се жали една скопјанка.

Од УЈП се децидни дека тоа е обврска и мора да се исполни.

„Решенијата за доплата и од еден или два денара, сепак, се обврска, која секој поединец мора да ја испочитува. Решенијата, сепак, претставуваат еден преглед и информација за граѓаните, колкави им се бруто-приходите, колку данок е платен и колку треба да доплатат“, велат од УЈП.

По закон, обврзникот е должен да ја плати утврдената разлика меѓу уплатената аконтација и годишниот износ на данок во рок од 30 дена од денот кога ќе го добие даночното решение. Управата за јавни приходи, пак, има обврска да донесе решенија за сите поднесени годишни даночни пријави, но и во сите случаи кога ќе се утврди дека обврзникот не поднел годишна пријава за персоналец, а имал обврска тоа да го направи. Тогаш висината на годишните приходи се утврдува врз основа на податоците за обврзникот со кои располага Управата.

Приходите на физичките лица се оданочуваат со персонален данок на доход од десет отсто.