Приведени бугарски новинари кои го снимале битолскиот затвор
Битола - Тројца новинари на бугарската национална телевизија биле приведени откако полицијата ги фатила на самото место како од периферијата на градот го снимаат затворот. Инцидентот се случил во петокот претпладне кога тројцата странски државјани, кои се претставиле како новинари и техничари на бугарската национална телевизија, од месноста Германски гробишта на ридот на битолскиот Баир, без дозвола од надлежните направиле неколку панорамски снимки на битолскиот затвор во населбата Црн Мост.
По приведувањето, кај нив биле пронајдени десетина спорни фотографии.
„,Согласно со нашите закони, СВР-Битола приведе бугарски државјани под сомнение дека сториле прекршок, закана за националната безбедност, со снимање одредени објекти. По разговорот, тие беа ослободени, но им се одземени 10 спорни слики“, изјави Ѓоко Стрезовски, портпарол на СВР- Битола. Во ослободувањето на странците интервенирал бугарскиот конзул во Битола, Илијан Караманов.
Информацијата за апсењето на новинарите веднаш била објавена на бугарските медиуми. Софиската агенција Новините, објави дека тројца членови на бугарската телевизија биле задржани од полицијата во Битола. „Директорот Константин Чакаров и двајца членови беа уапсени додека снимале објекти од национална безбедност“, стои во официјалната изјава. „Ние снимавме поглед на Битола од висока точка, за да ја вклучиме во проектот за Првата и Втората балканска војна. Кога пристигнаа две патроли, еден полицаец ни ги зеде личните документи и не' прекина во снимањето“, изјавил Чакаров. Потоа, не' приведоа и го прегледаа целиот материјал што го имавме снимено. За нашето ослободување ургираше бугарскиот конзул Илијан Краманов, истакнал тој за агенцијата Новините.
Во Битола се зборува дека овој инцидент, наводно, ја вознемири полицијата поради тоа што во битолскиот затвор е притворен Агим Красниќи. (А.Б.)
|
