Ѓоре Јовановски не се договори со Бангладеш

Еден од нашите најуспешни фудбалски тренери, поранешниот селектор на македонската репрезентација Ѓоре Јовановски, кој требаше да потпише двегодишен договор со Фудбалската федерација на Бангладеш, не ги прифати понудените финансиски услови на оваа азиска држава. Иако во дневниот печат беше објавено дека Ѓоре Јовановски потпишал двегодишен договор, тоа на крајот заврши само како желба на Бангладеш.

„Условите што ми ги понуди Фудбалската федерација на Бангладеш не ми одговараа. Во почетокот се договаравме едно, а на крај излезе друго. Затоа донесов одлука да не ја прифатам понудата“, ни рече вчера во телефонскиот разговор Ѓоре Јовановски.

Доколку заминеше за Бангладеш, Ѓоре Јовановски ќе беше четврти тренер од Македонија што ќе беше селектор на една странска држава. Пред него со голем успех Благоја Видиниќ ги водеше Мароко и Заир на светските првенства, едно време селектор на Азербејџан беше и Ѓоко Хаџиевски, како и Кирил Дојчиновски, кој го водеше Ел Салвадор. (М. М.)