Јонуз доби отказ во Дојран

Членовите на УО на ФФМ го разрешија селекторот едногласно, откако констатираа дека се прекршени одредбите од договорот

Сашко Ѓ. Димовски

Мирсад Јонуз е разрешен од функцијата селектор на македонската фудбалска репрезентација. Кога веќе самиот не поднесе оставка под силниот притисок од јавноста, тоа го сторија членовите на Управниот одбор (УО) на Фудбалската федерација на Македонија (ФФМ), на седницата во хотел „Истатов“ во Дојран во саботата, и тоа едногласно, откако констатираа дека се прекршени одредбите од договорот кога ја презеде функцијата од Словенецот Среќко Катанец во мај во 2009 година.

Јонуз на почетокот најави нова физиономија на репрезентацијата, офанзивна игра, па дури и атак на првите две места во групата во квалификациите за ЕП 2012. Таквите оптимистички најави тој ги темелеше на одличното познанство на фудбалерите со кои работеше во младата селекција. И сето тоа убаво личеше меѓутоа само на хартија.

„Концепцијата за работа во А тимот и резултатите што ги најави Јонуз по поставувањето на функцијата не се совпаднаа во реалноста“, се едногласни во размислувањата членовите на УО на ФФМ.

Реалноста излезе сосема поинаква. Наместо конкурентни на патот кон Полска и Украина, ние сме претпоследни во групата Б во која по шест одиграни меча сме подобри само од Андора. Во опасност сме да не го оправдаме рангирањето пред ждрепката за ЕП 2012 во која противниците ги дознавме од четвртиот шешир што, како што стојат работите, многу веројатно е нема да биде случај за наредната, онаа за СП 2014 во Бразил. За мундијалот во Јужна Америка можно е да имаме дури четири селекции подобар рејтинг од нашиот, да не го заборавиме и константниот пад на ранг листата на ФИФА.

Јонуз замина, но останува прашањето дали сета одговорност е кај предводникот на националниот тим. За добар дел, ќе се сложиме, да, но што е со онаа на фудбалерите, зарем тие треба да бидат аминувани од се за оддолжување кон колективот што им даде многу во нивните играчки кариери, а на кој недоволно му возвраќаат засега.

Неофицијално кај членовите на УО на ФФМ е присутно разочарување од односот на Јонуз во Дојран во саботата. Гласиштата одат дотаму што сите до еден, без исклучок, се почувствувале уценети и навредени од, како што се говори, селекторските опции што им биле ставени на маса за што никој отворено не сакаше да зборува, ниту да ги потврди, ниту да ги демантира.

„Или дозволете ми да го одработам договорот до крај или ќе барам обесштетување за негово предвремено раскинување“.

Јонуз имаше договор со ФФМ до крајот на 2012 година. За репрезентативниот ангажман добиваше месечен надомест од 5.000 евра, средства кои до крајот на договорот, довчерашниот селектор, по извршените консултации со правници, најави дека ќе ги бара по судски пат. Од ФФМ, пак, возвраќаат дека ќе бараат начин, преку правните механизми што стојат на располагање, да се заштитат.

Интерес за пополнување на испразнетото селекторско место во македонската фудбалска репрезентација се јави веднаш, но од ФФМ порачуваат дека нема да брзаат со именување на нов кормилар. Причина е слободниот летен период на националниот тим. Првата наредна кампања е пријателскиот меч со Азербејџан во Баку на 10 август, дотогаш нема никакви активности, па оттука и доволно време за прецизирање на условите за избор на нов селектор ма А тимот. За тоа ќе се расправа на првата наредна седница на УО по што ќе следува распишување на нов селекторски конкурс.