Жени и сестри на судии именувани за нотари од министерот 

Гордана Дувњак


По повеќе од шест месеци од објавувањето на конкурсот, министерот за правда Михајло Маневски, конечно, именуваше поголема група нотари. Од 22 испразнети места, засега се пополнети 18, додека за четири места се' уште се прават проверки. Непополнети се по едно место во Скопје, Битола, Кочани и во Куманово.

И покрај тоа што имињата на новоименуваните нотари се' уште се држат во тајност додека не заврши законската процедура, сепак, нивните имиња почнаа да излегуваат во јавноста. Првичните реакции во правосудните реакции се дека и овој пат не е избегнато од „стандардната шема“ и за овие престижни места со јавни овластувања, кои се во врвот по заработка во државата, се именуваат луѓе блиски до првиот човек на правосудството и роднини на носители на судски функции.

Дознаваме дека именувани се сопругите на двајца судии, на новиот врховен судија Ристо Катавеновски (Ивана Ефтимов) и на претседателот на штипска апелација Стојанче Рибарев (Лидија Рибарева), како и сестрата на истражен судија од скопска „единица“ (Јасмина Радончиќ). Според неофицијалните информации на „Утрински весник“, покрај овие три именувани нотарки, од кои две се во Скопје, а една во Штип, за нотари во главниот град зелено светло добија и Анита Адамчевска, Анастасија Петреска, Дрита Лимани и Муамет Шеху. За Битола е именуван Маринчо Вељановски, во Велес - Звонимир Јованов, во Прилеп - Натали Ацеска, во тетовското подрачје - Весна Масловарски-Костовска и Милаим Емурлаи, во Охрид - Никола Кузмановски, во Куманово - Мартин Божиновски, во Гевгелија - Маргарита Вангелова, во Гостивар - Тасим Саити и Себадин Даути, а во Кичево - Ахмет Халими.

Од Министерството за правда се воздржани околу објавувањето на имињата, бидејќи, како што тврдат, процедурата не е докрај завршена.

„Новоизбраните нотари се именувани на 1 декември и за тоа се известени, но од денот кога се известени, тече рокот од 30 дена во кој тие треба да докажат дека, во согласност со прописите, обезбедиле простор во тврда градба од 30 квадратни метри, а комисијата на ресорното министерство треба да направи увид на самото место. Дури кога тоа ќе се обезбеди, именуваните нотари ќе потпишат свечени изјави и ќе можат да почнат со работа“, ни изјави Здравка Скаловска, раководителка на Секторот за надзор на работата на нотарите, медијаторите и извршителите при Министерството за правда. Таа не се согласува со критиките дека предолго се чекало на изборот на нотари. Вели дека и покрај тоа што конкурсот бил објавен на крајот на мај, треба да се има предвид дека фатиле летните одмори, но и големите обврски што ги имало Министерството за правда околу подготовка на закони. Скаловска не сака да навлегува околу тоа кои биле пресудни критериуми при изборот, иако додава дека пресуден бил зборот на министерот.