Претходен број

СДСМ бара смена на Јанкулоска за „Змиско око“

МВР возвраќа дека полицијата нема ингеренции во обвинението и судот

Опозицискиот СДСМ вчера упати прашање до премиерот Никола Груевски кога ќе ја смени министерката за внатрешни работи, Гордана Јанкулоска. Повод за реакцијата е судската пресуда за „Змиско око“.

Пратеникот од СДСМ, Горан Минчев, на прес-конференција, рече дека лани ова време Јанкулоска се фалела со операцијата „Змиско око“, но дека и сега патарините работат на истиот начин и дека минатонеделната судска пресуда демантирала оти станува збор за спектакуларна полициска акција против 72 лица кои го оштетиле буџетот за пет милиони евра.

„Падна во вода се' што зборуваше Јанкулоска. Нема ниту злосторничко здружување, ја нема ниту штетата од пет милиони евра, остана само јавното омаловажување на обвинетите“, рече Минчев. „Спектакуларните полициски акции се прават само заради телевизиските камери и анкетите“, обвини тој, додавајќи дека „Владата на ВМРО-ДПМНЕ не бира средства и начин за остварување на своите партиски цели“.

Веднаш реагираше и МВР.

„МВР кога има основани сомненија за сторен криминал поднесува кривични пријави и нема ингеренции во изготвувањето на обвинителниот акт, застапување на обвинението пред судот и уште помалку при донесувањето на судската пресуда“, укажува МВР. Министерството се прашува дали СДСМ со ова врши притисок врз Апелациониот суд пред донесување на правосилната пресуда.

„Тоа што СДСМ не гледаше криминал во случаите ‘Бачило‘, ‘Градежна мафија‘, ‘Кокаин‘, ‘Пепел‘, повеќе говори за нивната перцепција на законите, отколку за ефикасноста на полицијата, чии напори во борбата против криминалот се препознаени во сите меѓународни извештаи“, велат во МВР. (П.Р.)