Американскиот дипломат Ричард Холбрук во критична состојба

ВАШИНГТОН - Ричард Холбрук (69), специјален пратеник на американскиот претседател Барак Обама за Авганистан и за Пакистан, е во критична состојба откако лекарите извршија хируршки зафат на неговата скината аорта, соопшти Стејт департментот. Искусниот американски дипломат, кој посредуваше за мировниот договор од 1995 година за завршување на балканските војни, е клучен играч во напорите на Обама да ја прекине деветгодишната војна во Авганистан, каде што насилството се зголемува и само оваа година загинаа најмалку 477 американски војници.

На Холбрук му се слоши во петокот, во зградата на Стејт департментот, и беше пренесен во околната универзитетска болница „Џорџ Вашингтон“. „Утринава лекарите извршија хируршки зафат на неговата скината аорта“, се вели во соопштението од Стејт департментот од саботата. „Тој е во критична состојба и со него е неговото семејство“. Кинењето на главната артерија во телото - познато како отворање на аорта - е болна и животозагрозувачка состојба, со ризик за компликации како што се мозочен удар, срцев напад и откажување на бубрезите, вели д-р Дјук Камерон, шеф на одделот за кардиохирургија во болницата „Џонс Хопкинс“ во Балтимор. Закрепнувањето често пати подразбира еднонеделен престој во болница, а уште три-четири месеци се потребни за целосно закрепнување, вели Камерон, кој не е дел од лекарите на Холбрук.

Пролонгираното отсуство на Холбрук би можело да значи удар за напорите на Обама да демонстрира брз напредок во Авганистан следната година, кога Вашингтон се надева дека авганистанските сили ќе го преземат водството и американските војници ќе почнат да се враќаат дома во јули. (Ројтерс)