Владата ќе го спасува виното откако ќе скисне

Александрија Стевковска

Непосредно пред бербата на грозјето се' уште се неизвесни мерките што ќе ги преземе Владата за да им помогне на винарските визби да не им скисне виното. Се планира да се субвенционира годинешното производство на вино, што автоматски би повлекло можност за целосен откуп на винското грозје. Сопствениците на винарските визби тактизираат, разговараат со претставници на Владата, но и кријат кои се моделите што им се предлагаат за испливување од винската криза. Дел од визбите вчера беа на состанок со министерот за земјоделство, Љупчо Димовски, но кога излегоа никој од нив не сакаше да одговори што им нуди државата. Изјава не сакаа да дадат ниту од Министерството, а оттаму посочија дека станувало збор за работен состанок, а дел од винарските визби негираа дека воопшто имало состанок, држејќи ги во тајност своите намери и тие на Владата. Тие, веројатно, на тој начин се обидуваат да ја спуштат цената на грозјето, а од друга страна, пак, да земат помош од државата за да се ослободат од огромните резерви вино.

„Расправавме за состојбата на грозјето и за претстојниот откуп. Имаше понуди што Владата ги даде за откупот на грозјето, но се' уште не се дефинирани мерките. Сепак, правиме напор да го откупиме севкупното грозје. Владата предлага стимулација околу откупот на грозјето. Не се тактизира со лозарите и со цената на грозјето, но станува збор за големи количини грозје, кои се останати во винарските визби и кои создаваат проблеми со откупот на новото грозје. Засега не се склучени никакви договори за откуп“, тврди Ѓорѓи Бебеџаков од винарската визба „Повардарје“.

Одлуката со какви мерки ќе им се помогне на лозарите и на визбите е одложена за наредната недела. Она што е извесно е дека најверојатно ќе се даде субвенција за литар произведено вино во домашните вински подруми и тоа преку субвенција на амбалажата на виното. Тоа би требало да биде мотив сопствениците годинава да откупат поголеми количини грозје, со што би се спасила домашната реколта. Пресметките одат во насока дека со оваа помош ќе му се помогне на нашето вино да се бори на глобалниот пазар со пониска цена. Осумдесетте винарски визби најверојатно ќе добијат помош од пет до шест денари за производство на литар вино во шише. Се шпекулира дека државата планира да донесе и странски откупувач на грозје на пазарот, што ќе го раздвижи пазарот и ќе создаде поголема конкуренција, која ќе ја диктира откупната цена. Визбите веќе најавија намален откуп поради намалената потрошувачка на вино на странските пазари. Тие се сега полни со едногодишни резерви.

Лозарите, пак, се во паника. На прагот на новата берба тие се' уште ги немаат добиено парите од ланската реколта. Се жалат дека состојбата е катастрофална затоа што за претстојниот откуп немаат ниту склучено договори со винарските визби. „Состојбата е катастрофална, ние ги немаме добиено парите уште од ланската берба. Не знаеме како ќе опстанеме оти и оваа година винарските визби најавија дека ќе откупуваат многу мали количини и по пониски цени од ланските“, се жалат лозарите.

Меѓу лозарите веќе се шират информации дека некои винарски визби почнале да калкулираат со цена од три денари за килограм „смедеревка“.

Останува да се види дали тоа ќе се реализира во практика или, пак, владината помош ќе овозможи откупните цени да бидат во некои разумни граници.