Груевски: Промоторите се апсолутно исплатливи

За премиерот Никола Груевски, концептот за привлекување странски инвестиции преку испраќање промотори низ повеќе земји во светот, е апсолутно исплатлив проект. Тој вчера како за пример наведе дека како резултат на работењето на економските промотори, во земјава била отворена болница во населбата Ѓорче Петров, инвестиција од Турција, која ја донел промоторот што работел во таа земја.

Ова е реакцијата на Груевски откако Агенцијата за странски инвестиции преку објавениот оглас завчера побара уште нови осум економски промотори за Белгија, Данска, Јужна Кореја, Канада, Обединето Кралство, Турција, САД и за Франција, покрај оние 23 што веќе бараат инвеститори по светот.

Според него, и покрај намалениот интерес на инвеститорите за нови вложувања, промоторите не губеле време и остварувале контакти. Дали вреди издвојувањето огромни пари од буџетот за овој проект? Груевски вели: „Апсолутно вреди! Сите оние што говорат дека се тоа залудно потрошени пари или се во голема заблуда или го прават тоа чисто само да најдат забелешки на работењето на Владата онаму каде што ги нема“, порача вчера Груевски. Според него, концептот со промоторите е веќе потврден и го спроведуваат и другите држави. Повторно истакна дека поради светската економска криза, намалени се инвестициите, но промоторите и во овој период не губеле време и остварувале контакти. Можеби моментно немало инвеститори, но по кризата, тие ќе се сетеле на контактите со промоторите од Македонија.

„Концептот е исплатлив и дава резултати и ќе носи уште повеќе резултати кога ќе помине светската економска криза. Има повеќе инвестиции што се остварени по контактите со промоторите, а тоа го зборуваат и самите инвеститори. Последна инвестиција, на чие отворање лично присуствував, е болницата во населбата Ѓорче Петров, турска инвестиција, која е резултат од контактот со промоторот“, истакна Груевски. (С.М.)