Насловна

Годишнина од стрелањето на ваташките младинци

Свежо цвеќе на Спомен-костурницата во Моклиште

КАВАДАРЦИ - На споменикот на дванаесетте ваташки младинци во Моклиште вчера се одбележа 68-годишнината од ѕверското убиство што го изврши бугарскиот фашистички окупатор. Роднини на стреланите и претставници на општествено-политичкиот живот во Кавадарци положија свежо цвеќе на гробницата во Ваташа.

Во спомен-костурницата во Моклиште се погребани посмртните останки на 12 ваташки деца. Историските податоци за гнасниот чин што го извршил бугарскиот фашистички окупатор говорат дека на кобниот 16 јуни се приведени и сослушувани 17 младинци од селото Ваташа, меѓу кои и четири девојки, сестри на младинците. По сослушувањето и малтретирањето, со цел да ги издадат партизаните и илегалците, откако ништо не откриле младинците во строј и со воени команди биле однесени до Чаирот. Машките биле построени пред бугарските фашистички војници, а девојките зад убијците за да сведочат за масакрот. Потоа момчињата биле стрелани, па масакрирани.

Споменикот со спомен-костурницата на дванаесетте ваташки скоевци е подигнат на два километра јужно од селото Ваташа, во месноста Чаирот во Моклиште. Автор на спомен-костурницата, која свечено е откриена на 11 октомври 1961 година, е Јордан Грабуловски, академски вајар од Прилеп. На јужниот ѕид на споменикот е запишано: „Смртта стана немоќна пред нашата младост, исправена пред очите наши загледани, уште тоа утро во иднината“. (А.Д.)