Насловна

И Гостивар го има Обама, па САД не се лутат

На гостиварци не им е јасно зошто се лути Грција за споменикот на Александар Македонски

Киро Кипроски

Гостивар - Веќе две години кафуле во Гостивар го носи името на претседателот на САД, Барак Обама. И внатре и на надворешниот дел од кафулето има неколку фотографии со ликот на американскиот претседател, додека пред самиот локал е поставен огромен билборд. Сопственикот на кафулето вели дека на Обама ќе му излие и споменик ако има пари. Сигурен е дека Американците нема да му се лутат. Исто како што Русите никогаш не се налутиле поради бистата на Ленин што со години го красеше центарот на Гостивар.

Гостиварци велат дека двете најголеми светски сили не ре��гираат за ова, ниту, пак, сметаат дека на овој начин некој им ги одзема ликовите од нивната историја. Оттаму тие се убедени дека непотребно се крева голема прав за пристигнувањето на Александар Македонски на Букефал во центарот на Скопје. Во целост го поддржуваат зафатот, со мала задршка за големиот износ на потрошените средства за реализација на проектот.

„Требаше многу порано македонската метропола да ја краси споменик на светскиот војсководец и стратег Александар Македонски“, смета 59- годишниот Цветко Стефановски, според кого, големиот Александар треба да го почитуваат сите, без разлика од каде се.

Голем број фирми, бутици, ресторани, кафулиња, бурекчилници, чајџилници во Гостивар носат имиња на светски метрополи и личности, на историски места од сите континенти, региони и слично. Можете да направите веселба во ресторанот „Мон Блан“, а за таа пригода да се снабдите со свечена облека во бутиците „Париз“, „Милано“, „Лондон“... Или, да појдете во ресторанот „Сиднеј“, или да ја почувствувате „Африка“. Ако ги сакате арапските игри, на пример, табла „шеш-беш“, на располагање ви е чајџилницата „Александрија“, а доколку сте љубител на добрата капка алкохол од светските брендови или на кондиторски производи, тогаш влезете во маркетите „Американо“, „Монтенегро“... А, Ориентот можете да го доживеете и во неколку ресторани, од кои најпознат е „Босфор“.

Од поширокиот регион на Гостивар печалбари имало и има речиси на сите страни на светот. Со враќањето во родниот крај, како знак на почит, благодарност или поради носталгија за местото каде што ја минале младоста и каде што добро спечалиле, тие своите фирми ги крстат со имиња на местата каде што биле, или со славни имиња од државите во кои престојувале. Сметаат дека со тоа не направиле ништо лошо, бидејќи, како што ни рекоа некои од нив, генијалците подеднакво им припаѓаат на сите луѓе во цел свет.