„Госпоѓа министерка“ како музичка вртелешка
„Госпоѓа министерка“ во полн сјај повторно е на сцената на МНТ, во една мјузикл- верзија
Јасминка Павловска
„Госпоѓа министерка“ ја немало на македонската сцена (или барем на онаа на МНТ) дваесетина години, а речиси и никој не го забележал нејзиното „отсуство“. Веројатно зашто духот, идејата и темата на оваа хероина од опусот на Бранислав Нушиќ зачестено, речиси постојано ја сретнуваме во секојдневјето. Но, од саботата, 28 март, „Госпоѓа министерка“ во полн сјај повторно е на сцената на МНТ, во една мјузикл- верзија, инкарнирана со актерската интерпретација на Весна Петрушевска, а во режија на Наташа Поплавска.
Новата тричасовна верзија на Нушиќевото веќе класично дело најмногу е забавна, шарена претстава, многу слично на ТВ - шоу, какво што впрочем и води Весна Петрушевска, носителката на главната улога. Текстот и ликовите на Нушиќ се „верно пренесени“, но бидејќи и самите „душа си даваат“ за современи адаптации, беше сосема очекувано нивното интерпретирање во контекст на актуелниот простор и време, како и кокетирањето со сексуалните ориентации и дезориентации на ликовите.
Министерката Живка на Петрушевска е сосема по теркот транзиционите снобови (со „Сваровски“ - кристал на забот, наместо „оригинал златниот“ од текстот), постојано во состојба на афект, но со оглед на должината на претставата, на моменти се развлекува хумористично - сатиричната поента. Успешноста на другите ликовите е варијабилна, особено на Сашко Коцев во улогата на зетот Чедо, кој како да не ја пронајде вистинската димензија за итрината и мангуплакот на ликот што ќе и' го „види крајот“ на занесената госпоѓа министерка. Но затоа, Александар Микиќ во улогата Риста Тодоровиќ, трговец со кожа и почесен конзул на Никарагва, изврши велемајсторско трансформирање на класичната слика за ликот и белскав миг во претставата. Ново динамично „читање“ на стрина Даца направи Драгана Миленковска, која се издвои сосема од хорот на фамилијата, а сосема ефектна за крај беше и Жаклина Стевковска како госпоѓа Ната.
Играјќи по жицата на бурлеска и мјузикл, со мултимедијална поддршка (видеобим, на кој ефектно беа илустрирани сонговите, а послужи и како добра сценографија), новата „Госпоѓа министерка“ е сосема забавна и привлечна претстава.
|
