Политичари и деца

Ќе го видиме ли нашиот премиер како ги гушка ќерките во јавност?

Само четири дена по раѓањето на приновата, британскиот премиер Дејвид Камерон и' ја прикажа својата наследничка на јавноста. Официјалните фотографии пред Даунинг стрит 10 дојдоа шест дена подоцна

Катерина Шекеровска

Насмеани лица, весели бои и среќно бебенце во рацете. Вака изгледаше семејната фотографија на британскиот премиер Дејвид Камерон и на неговата сопруга Саманта, направена десет дена по раѓањето на ќеркичката Флоренс Роуз Енделин Камерон пред вратата на нивниот дом на Даунинг стрит 10 во Лондон. Флоренс е второто бебе (по синот Лео на експремиерот Тони Блер, кој се роди во мај 2000 год.), кое ги израдува соседите на Даунинг стрит по 150 години. Камерон не издржа и својата радост ја подели со цела јавност само четири дена по раѓањето на својата наследничка кога првпат дозволи заедничко фотографирање.

Гордиот татко не само што не ја скри приновата од очите на јавноста туку јавно одговараше и на сите прашања поврзани со неговите родителски обврски, како што се менувањето пелени, станувањето ноќе, капењето, а притоа постојано ја бакнуваше малата, која го држеше за прстите. Не заборави ни да се заблагодари за сите честитки упатени на неговата адреса по повод проширувањето на семејството, а во знак на внимание кон своите почитувачи, ќеркичката ја облече во бел шал добиен на подарок од една повозрасна Б��итанка, 74-годишната баба Џејни, на која, како што рече, и' биле потребни пет недели за да го сплете шалчето и да го испрати на адресата на премиерот.

Македонската јавност за ваква слика може само да сонува. За разлика од нивните колеги во светот, македонските политичари ги кријат своите наследници од очите на јавноста како што змијата си ги крие нозете. Сте го виделе ли некогаш, на пример, премиерот Никола Груевски како ги гушка своите две ќерки Анастасија и Софија додека ги шета низ градот? Како им купува сладолед? Или можеби ги носи во игротека, во парк? Фотографиите на кои може да се сретне нашиот премиер со своите ќеркички се вистинска реткост, се бројат на прстите од едната рака и, секако, го носат предзнакот папарацо. Оти во ниту еден друг случај премиерот не дозволува јавноста да го види со неговите најмили. Некои на шега велат дека се плашел од уроци.

Груевски е првиот македонски премиер, кој во текот на мандатот се ожени (ова е негов втор брак) и доби две ќеркички - првата, Анастасија, се роди на 6 ноември 2007 година, а нејзината сестричка, Софија, дојде на свет на 4 февруари 2010 година.

И толку. Јавноста и натаму речиси ништо не знае за својот и за семејниот живот на останатите политичари, чија јавна функција, секако, подразбира и зголемен интерес на јавноста за нив и нивниот приватен живот. Зошто толкава мистериозност? Па и јавноста понекогаш сака да види и да слушне дека и тие се од крв и месо, дека знаат да менуваат пелени, да прават кашички, дека ги превезуваат децата во градинка, одат на родителски состаноци, им купуваат ролерки... Едноставно, дека покрај тоа што се политичари, се и родители.

Не е премиерот единствен што не се фотографира и не ги прикажува своите ќерки во јавност. И пратеничката Радмила Шекеринска одбива да се слика со својата ќеркичка Ада во обид, како што вели, да ја зачува приватноста. А приватноста може да ја зачува само ако се повлече од политиката. Пред да се породи, со месеци се објавуваше во кој месец од бременоста е и како ја поднесува, а сега треба да се зачува приватноста.

Ретко некој од министрите или од пратениците се појавуваат со своите наследници. Овде-онде, во некој весник, фотографија или папарацо-сторија... Го видовме пратеникот Влатко Ѓорчев со ќеркичката Марта, министерот за надворешни работи, Антонио Милошоски, со тригодишниот син Давид (Милошоски секој слободен миг му го посветува на синот и често може да се сретне пред зградата каде што живее или на лулашки), исто како и експремиерот и пратеник Владо Бучковски, кој често шета низ парк и во центарот на градот со сопругата Катерина и со синовите... Во последно време се' повеќе се експонира и синот на претседателот на државата, Ѓорге Иванов...

Примерите се бројат на прсти, а заклучокот е едноставен: македонските политичари живеат во еден стегнат свет на норми на кои самите им се робови и има уште многу да учат од своите странски колеги.