Фолк-фест „Филиграни“ по седумнаесетти пат

В петок, на 17 септември, во салата на Домот на АРМ во Скопје ќе се одржи 17. издание на Интернационалниот фолк-фестивал „Филиграни 2010“. Фестивалот ќе биде директно телевизиски пренесуван на првиот канал на Македонската телевизија, со почеток во 20 часот. Своето репризно издание „Филиграни 2010“ ќе го добијат на Собранискиот канал. Традиционална водителка на фестивалот е Катерина Стојановска-Десковска.

Фестивалската програма започнува со изведбата на најслушаната песна меѓу две фестивалски изданија „Убава Македонка“, што ја изведоа Сузана Гавазова, Зоран Дамјанов и групата „Луда Мара“ минатата година. Потоа фестивалот продолжува со натпреварувачкиот дел, каде што ќе настапат 23 учесници: Жаклина Узунова, Петар Нечовски, Јадранка Тушевска со „Валандовски свадбари“, Влатко Вучков, Благица Павловска, Томислав Тоцинов, Гоце Арнаудов, „Овчеполски свадбари“, Круме Спасовски, Дарко Стојановски, Туше, Катја Спасовска од Бугарија, Џени Окело, Саит и „Идоли“, Игор Станков, Горан Симески, Сузана Гавазова, Горан Јованов, Дуле Зрновски, Софија Кочовска, Даниела Темелковска, Боби Андевски и Новица Василевски.

На ревијалниот дел на „Филиграни 2010“, кој ќе се случува во паузата за гласањето, ќе настапат Зоран Дамјанов, Вики Среброва , Војо Стојановски и Ани Малинкова со своите најхитовски песни изведени на овој фестивал. (Ј.П.)