ЏЕЈ-ЗИ

Сериозен за купувањето на „Арсенал“

Раперот Џеј-Зи е подготвен да вложи пари во фудбалскиот клуб „Арсенал“. Музичарот-бизнисмен веќе подолго време размислувал за тоа, бидејќи, како што вели, идејата му изгледала привлечна. Неодамна се врати од одмор, кој со сопругата го мина во Италија, и сега, полн со работен елан, мисли дека е вистинско време за акција. Единствено што сака е да има активна улога во донесувањето одлуки.

„Во тој случај, со Бијонсе ќе треба да минуваме поголем период во Лондон. Таа најдобро знае колку сум вљубен во спортот и дека сериозно размислувам подолго време за тоа. Не сакам да бидам инвеститор од сенка, напротив, сакам да бидам вклучен во донесувањето одлуки. Сега сум во една фаза во кариерата кога сум подготвен за вакво вложување. Сакам голем процент од ’Арсенал’“, рече хип-хоп ѕвездата.

Освен интересот за спомнатите вложувања во фудбалот, раперот се занимава и со други проекти. Неодамна неговата издавачка куќа потпиша договор со деветгодишната ќерка на Вил Смит, Вилоу. Песната „Вајп мај харт“ веднаш стана хит на Интернет-порталите. Џеј-Зи е сопственик на клубот „40/40“, има голем удел во НБА-тимот „Њу Џерси нетс“, а успешно работи и со брендот за облека „Рокавер“. Се смета за еден од најбогатите американски музички артисти и интерпретатори, односно само во 2009 година заработи 150 милиони долари.