Да се почитува вистината
Министерство за транспорт и врски
Министерството за транспорт и врски најостро реагира на невистинитите наводи пренесени во текстот на „Утрински весник“ со наслов „Ќе има ли истрага за 21 милион евра во Транспорт?“, објавен на 2 јули и потпишан од новинарите Катица Чангова и Гордана Дувњак. Во него се вели дека „Во случајот со ревизорскиот извештај на Министерството за транспорт станува збор за прилично голема свота од 21 милион евра. Тоа е многу повеќе во споредба со 720.000 евра колку што Министерството за одбрана плати за обесштетување овци, а потоа се отвори и случајот ’Бачило‘. Владата не ја обжалила пресудата со која на Иснифарис Џемаили му се исплатени 720.000 евра како отштета за гранатирано бачило во 2001 година“.
Во однос на невистинитите обвинувања од страна на пратеникот Јани Макрадули, на кои се заснова написот во „Утрински весник“, министерот за транспорт и врски на прес-конференција одржана 25 јуни 2009 година ги отфрли сите изнесени обвинувања како невистинити. Во текстот пренесен во „Утрински весник“ нема ниту една реченица со која се информира јавноста за отфрлените обвинувања.
Ве потсетуваме дека при информирањето на јавноста основна задача на новинарите е да ја почитуваат вистината и правото на јавноста да биде информирана во согласност со Уставот, а не да бидат продолжена рака на политичка партија, притоа почитувајќи ги етичките вредности и професионалните стандарди во пренесувањето на информацијата, новинарите треба да бидат објективни и точни, а информацијата пред да биде објавена да биде проверена, како не би се дезинформирала јавноста. Исто така, Ве потсетуваме дека согласно член 172 од Кривичниот законик „тој што за друг лажно изнесува или пронесува дека сторил кривично дело за кое се гони по службена должност ќе се казни за клевета“. |
