Претходен број

Што бара Јанакиески?

Редакција „Утрински весник“

„Утрински весник“ објави серија текстови посветени на ревизорскиот извештај за финансиско-материјалното работење на Министерството за транспорт и врски. Новинарите најнапред информираа од дебатата што се отвори на седницата за пратенички прашања во Собранието по повод ревизорските наоди. Истиот ден ја проследија и прес-конференцијата на министерот за транспорт и врски, Миле Јанакиески, свикана за истата тема. Сето тоа беше објавено на страниците на весникот. Потоа следуваа неколку редакциски текстови и коментари околу наодите на ревизорот во ресорот Транспорт. „Утрински“ изврши увид во ревизорскиот извештај дистрибуиран во Собранието и објави делови од содржината.

Министерот Јанакиески изразува незадоволство затоа што во објавениот текст „Ќе има ли истрага за 21 милион евра во Транспорт?“ потпишан од новинарите Катица Чангова и Гордана Дувњак немало „ниту една реченица“ со која тој ја информирал јавноста „за отфрлените обвинувања“. Во дописот до „Утрински“, меѓу другото, потсетува дека согласно со член 172 од Кривичниот законик „тој што за друг лажно изнесува или пронесува дека сторил кривично дело за кое се гони по службена должност ќе се казни за клевета“.

Редакцијата не се плаши од вакви закани против новинарите кои ја завршија својата обврска како што треба. Министерството треба да си ја заврши работата одговорно за потоа ревизорот да не наведува редици сомневања. Патот до судницата тогаш може да биде многу кус.