„Прилепските бомбаши“ за експлозиите чуле од медиумите
Започна судењето на шестемина обвинети за злосторничко здружување
Горан Адамовски
Во скопскиот Кривичен суд започна судењето на шестчлената група, позната во јавноста како "прилепските бомбаши", обвинети дека под закани со бомби, наводно, изнудувале пари од сограѓани. На вчерашниот главен претрес на обвинителната клупа седнаа Звонко Илиоски-Лутото (51) и неговиот син Самоил (29), Маријан Маркоски-Мачето (40) и Емил Ангелески-Ампата (30), додека на Злате Јованоски-Бомбата (24) и Горанчо Петрески-Трде (33) ќе им се суди во отсуство, бидејќи се во бегство. Доколку се покажат точни наводите на Обвинителството дека поранешните припадници на единицата "Лавови" извршиле злосторничко здружување и предизвикување општа опасност, им следува затворска казна од најмалку четири години.
Звонко Илиоски-Лутото, кој заедно со Никола Мојсовски-Кољо, кој во меѓувреме беше убиен, е посочен дека во 2001 година ја формирале опасната група, ги негираше ваквите тврдења. Во своето сведочење пред судот, Илиоски рече дека станува збор за "монтиран процес". Тој тврдеше дека целиот процес бил инициран од поранешен началник на прилепската крим-техника, кој бил осуден на шестмесечна затворска казна, бидејќи пред три години со четири лица го претепале Илиоски.
Илиоски, кој во своето досие има пресуда од една и пол година поради изнуда, ја оспоруваше и таа пресуда, тврдејќи дека од бизнисменот од Прилеп не сакал да изнуди пари, туку само си ги барал парите што требало да ги добие за бизнис-зделката што ја склучил со него.
"Тој постојано ме избегнуваше и затоа му праќав пораки преку мобилен телефон, во кои му пишував дека е измамник, а и го пцуев", сведочеше Илиоски. На прашањето на судијата Горан Бошевски да каже што знае за бомбите, Илиоски тврдеше дека за нив разбрал од "весниците и од зборувањето на граѓаните".
Според обвинението, оваа група ги извршила фамозните бомбашки напади во 2005 и во 2006 година кога беа фрлани серија од десетина "кашикари" и шок-бомби пред ноќни клубови, куќи на прилепски бизнисмени и угостители, но и на ексначалникот на крим-полицијата и на градоначалникот Марјан Ристески. |
