Земјиште за хотел - две евра квадрат

Штипската фирма „Оаза“ ДОО купи државно земјиште од близу 3.000 квадрати за малку повеќе од 5.600 евра. Покрај „Оаза“, вчера лицитираа фирмата „Дасто“ од Скопје и лицето Зоранчо Петров од Штип. Се наддаваше со минимален чекор од 10 денари за квадрат и притоа почетната цена од 61 денар квадратен метар штипската фирма ја зголеми на 120 денари, со што како најповолен понудувач стана сопственик на градежното земјиште. За целата парцела ќе треба да плати вкупно 345.240 денари.

Компанијата „Оаза“ е во сопственост на Славе Ивановски и на Љупчо Манџуков, познати штипски хотелиери, кои со овој бизнис се занимаваат подолг период. Во Штип се познати како газди на главниот хотел во градот, некогашниот „Астибо“, а денес хотел „Оаза“, како и по тоа што имаат повеќе угостителски објекти. Во последно време бизнисот го прошируваат и на полето на оранжериското производство.

„Оаза“ е должна да ги уплати средствата во рок од 15 дена од приемот на писменото известување што го издава Комисијата по завршување на јавното наддавање. Доколку не го стори тоа во утврдениот рок, ќе се смета дека градежното земјиште не е отуѓено и нема да се склучи купопродажниот договор, а депонираните средства нема да бидат вратени. (Б.A.)