Напаѓачот од Мумбаи добивал наредби од пакистанска група
Индија ја обвинува групата за нападите во 2006 година врз возови во Мумбаи и за нападот во 2001 година
МУМБАИ - Напаѓачот од Мумбаи добил наредби од оперативниот шеф на исламска милитантна група од Пакистан, која во мај беше прогласена за терористичка од страна на САД, јавија вчера индиски безбедносни претставници. Единствениот преживеан напаѓач изјави пред иследниците дека тој и другите деветмина напаѓачи биле во контакт со Заки-ур-Реман Лакви, за кого САД тврдат дека е оперативен шеф на милитантната група Лашкар-е-Тоиба (ЛеТ) со седиште во Пакистан. ЛеТ стана позната по борбата против индиската власт во спорниот регион Кашмир и се наоѓа на терористичката листа на САД, ОН и на Индија. Во минатото беше поврзана со пакистанската разузнавачка служба.
Индија ја обвинува групата за нападите во 2006 година врз возови во Мумбаи и за нападот во 2001 година врз индискиот парламент што ги разгоре тензиите и ги доведе Индија и Пакистан на работ на четврта војна.
Напаѓачот Азам Амир Касаб изјави пред иследниците дека разговарале со Лакви и другите лидери на ЛеТ за време на патувањето со чамец до Мумбаи и додека се бореле со специјалните сили во два хотела во Мумбаи, каде што беа убиени повеќето од 171 жртва во нападите. Според двајца високи полициски претставници во Мумбаи инволвирани во истрагата, информацијата за неколку повици до Пакистан била потврдена на сателитски телефон пронајден во рибарски чамец, киднапиран и употребен од напаѓачите на нивниот пат до Мумбаи.
„Тие добија насоки каде да се истоварат со чамците, каде да ги чуваат бомбите“, рече претставник на безбедноста во врска со малиот чамец што го користеле напаѓачите за да пристигнат на крајбрежјето во Мумбаи. Тие, исто така, пронајдоа навигациската направа ГПС со податоци кои упатуваат на Карачи, јавија официјални лица.
Касаб, кој се согласил да дојде во Мумбаи бидејќи му била ветена готовина за неговото сиромашно семејство, изјави пред иследниците дека нивните обучувачи им дале „стратегиски совет“ за операцијата во телефонски разговор и го управувале нивното движење, јави еден од иследниците за Ројтерс. Милитантот (21), кој вели дека потекнува од областа Фаридкот од паки��танската провинција Пенџаб, исто така изјави пред иследниците дека Лакви е еден од оние кои ги известувале за целите во Мумбаи.
Пакистанскиот претседател Асиф Али Зардари се сомнева дека Касаб е Пакистанец и рече дека за секого што ќе биде утврдено дека бил соучесник во нападите, ќе има судење во Пакистан. Според владата на САД, Лакви (48) ги раководел воените операции на ЛеТ во Чеченија, Босна, Ирак и Југоисточна Азија и наредувал регрутација и обука на самоубиствени напаѓачи во 2006 година. „Пред тоа Лакви им дал инструкции на оперативците на ЛеТ да спроведат напади во населени области“, се истакнува во соопштението на американското Министерство за финансии во кое тој се прогласува за терорист.
Индија бараше Пакистан да предаде над 20 лица, меѓу кои основачот на ЛеТ Хафиз Мохамед Саед, Лакви и Јусуф Музамил, шеф на антииндиските операции на ЛеТ. Њу Делхи одамна е лут, бидејќи Пакистан не е ниту подготвен ниту способен да ги спречи милитантните групи да планираат напади врз Индија од пакистанска територија. (Ројтерс) |
