Жетвата на пченицата при крај, цената неизвесна
Жетвата на пченицата привршува. Земјоделците се задоволни од квалитетот и од приносите што се очекува да достигнат 300.000 тони, но не и од откупната цена, 13 денари за килограм што ја нудат мелничарите.
Сушата, велат, не се одрази значително врз житото, иако родот малку го намалија високите температури во последните неколку дена.
„Годинава имаме средно бериќетна жетва. Приносите од пченицата се добри, многу подобри од лани, но потфрлија на површините каде што не се применуваа соодветни агротехнички мерки, односно каде што не се употребуваше доволно минерално ѓубре и заштита на растенијата од плевели и штетници“, вели претседателот на Сојузот на земјоделците, Вељо Тантаров. Производителите го чекаат формирањето на новата влада за да се реализира, како што рече Тантаров, ветувањето за откуп на 40.000 тони пченица за потребите на стоковите резерви. „Очекуваме Владата да донесе и одлука за поврзување на увозот на пченица и брашно со откуп на домашна пченица, како лани. Дали овие мерки се добри или лоши, времето ќе покаже. Секоја земја има инструменти за заштита на домашното производство од преголем увоз“, смета Тантаров.
Тој уште еднаш напомена дека земјоделците нема да ја дадат пченицата под 15 денари за килограм. Според него иако државата пролетва на мелничарите им даде пченица од стоковните резерви по 16 денари за килограм, кога увезуваа за 20 денари, тие добија 40.000 тони, а не ја намалија цената на лебот. Македонскиот пазар годишно има потреба од околу 280.000 тони пченица. Поради практиката на преработувачите да не се откупува домашното жито во целост, увозот во просек достигнува 120.000 тони. (МИА) |
