Културното наследство не вреди без луѓе

На Министерската конференција вчера беа се усвоени два документа на Советот на Европа: „Скопје агенда“ и конвенцијата ФАРО

Катерина Богоева

Во рамките на македонското претседателство со Комитетот на министри на Советот на Европа, вчера во републичкото Собрание беше отворена конференција на министрите на култура на земјите-членки, под наслов „Општествена вредност на културното наследство во Европа“, како придонес кон актуелните тенденции за засилување на интегрирањето на наслеството во останатите сфери во општеството. Најавеното присуство на 48 делегати од 23 земји, меѓу кои и експерти за заштита, и усвојувањето на двата значајни документа: „Агенда Скопје“ и Рамковната конвенција за општествена вредност на културното наследство во Европа - ФАРО на Советот на Европа, ја вбројува Македонија и на овој начин меѓу земјите што ги следат современите тенденции во третманот на културното наследство и на него гледаат како на сериозен фактор за развој.

Преку „Агенда Скопје“, почнувајќи од идната година, Македонија во следните три години ќе врши мониторинг и евалуација на проектите на Советот на Европа што се реализираат во регионот на Југоисточна Европа. Со потпишување, пак, на конвенцијата ФАРО, која предвидува интегрир��н пристап во заштитата на културното наследство, документот ќе стапи во сила. „Човечкиот капитал и луѓето се во центарот на нашето внимание“, потенцираше вчера, Роберт Палмер, директор за култура и за културно и природно наследство во Советот на Европа, укажувајќи на историските процеси што довеле до тоа, општествената вредност на културното наследство, денеска да се разгледува регионално, надвор од националните граници во контекст на почитувањето на човековите права.

Конференцијата ја отвори министерката за култура, Елизабета Канческа-Милевска, а свои обраќања, со потенцирање на потребата од развивање на интегриран пристап во заштитата на културното наследство, имаа и заменик-претседателот на Владата задолжен за европски прашања, Васко Наумовски, генералниот директор за образование, култура и наследство и млади и спорт на Советот на Европа, Габриела Батаини Драгони, и министерот за земјоделство, шумарство и водостопанство, Љупчо Димовски.

Денеска, на последен ден од нејзиното одржување, во хотелот „Холидеј ин“, ќе биде промовиран Советот на министри за култура на Црноморскиот регион и Јужен Кавказ, а Советот на министри за култура на Југоисточна Европа ќе одржи состаноци посветени на механизмите за регионална соработка.