МОТ завршува со „Љубов моја“ на Словенско гледалишче

Денеска на МОТ е денот кој е посветен на самиот фестивал, на неговиот 35-годишен јубилеј , на сето она што тој значеше, но и на луѓето кои на различен начин беа дел од него. Во 20 часот вечерва е закажано генералното собрание на МОТ, кое ќе се одржи во новиот клуб на МКЦ.

На програмата денеска повторно е „Один“ театарот од Данска и Еуџенио Барба со претставата „Мало малечко“. Оваа претстава беше закажана за 22,30 часот во МОБ, но ќе се одржи во МКЦ. „Мало малечко“ е една интересна и необична интерактивна претстава, која вели дека темните сили не' водат, не' заслепуваат и не' просветлуваат. Во сабота на полноќ во клубот на МКЦ е и македонскиот независен проект на Софија Ристевска „Лили“, посветен на секоја жена и на сето она непознато и сексуално што таа го носи во себе. „Лили„ е работена по делото „Кралот на Хавана“ на кубанскиот крал на „валканиот реализам“ на Педро Хуан Гутиерез и по текстот кој низ работилници го подготвила театарската екипа.

Во недела во 12 часот ќе може да се проследи презентацијата и промоцијата на монографијата на Словенско младинско гледалишче, на кое годинава МОТ му доделува „Златна плакета“ за соработка и за неговиот придонес во развојот на овој фестивал. Овој театар гостува со две претстави, кои ќе се одржат на самото затворање на МОТ во недела од 20 и од 22,30 часот, и тоа: „Проклет да е предавникот на својата земја“ во режија на Оливер Фрљиќ од Хрватска и „Љубов моја“ на Пазолини во режија на Иван Петернељ. Последниот ден од 18 часот скопската публика ќе може да ја види и претставата на Народниот театар од Битола, „Калеш Анѓа, дефинитивно“ на Катерина Момева, а во режија на Драгана Милошевска - Попова. „Преку процесот на уривање на еден мит, сакаме да кажеме дека живееме во време кога секој мит се доведува во прашање“, се вели во каталогот за претставата, во која играат: Илина Чоревска, Никола Пројчевски, Соња Михајлова, Петар Горко, Огнен Дранговски и други. (С.У.)