Металург најблиску до баражот за опстанок во Првата лига

Миодраг Мицковиќ

Утре се игра последното прволигашко коло, кое не привлекува големо внимание бидејќи многу работи се јасни што се однесува за пласманот во лигата. Македонија ЃП пред две кола ја обезбеди титулата, веќе им даде одмор на повеќето фудбалери, си заминаа на одмор странците: Павловиќ, Амбурет, Попол, Брито и Оса така што на мечот со Ренова во Ѓорче Петров ќе настапи со играчи кои годинава немаа поголема минутажа на теренот. Откако Милано доби лиценца за настап во европските купови, познати се и нашите тројца претставници во Купот на УЕФА, од идната година Европскиот куп. Тоа се Ренова, Милано и победникот на Купот, Работнички.

Доста е разбистрено и на дното на табелата, особено по поразот на Металург од Вардар. Напредок е веќе второлигаш, Пелистер ќе игра во баражот, најверојатно ќе го придружува Металург, кој има два бода помалку од Победа што не е малку. Во утрешното, последно коло Металург игра во Автокоманда со Милано, Победа го пречекува Вардар и тешко е да се поверува дека прилепчаните ќе ја пропуштат големата шанса за опстанок, иако во фудбалот се' е можно. На прилепчаните им е доволен и бод за опстанок.

Другите два натпревари немаат никаков натпреварувачки интерес: Напредок - Работнички и Пелистер - Хоризонт Турново. Дури како што дознаваме овие четири екипи ќе играат со повеќе резервни играчи, особено Пелистер кој се чува за баражот. Почеток на средбите е во 17 часот.

Меѓутоа, прашањето за Пoбеда се' уште не е расчистиeно. По потврдувањето на казната на УЕФА, за доживотната суспензија на нејзиниот претседател и капитенот Александар Забрчанец и Николче Здравески, како и осумгодишна казна забрана играње во меѓународните купови поради основано сомневање дека мечот меѓу Победа и Пjуник од Ерменија е наместен, последен збор за целиот овој случај треба да го кажат дисциплинските органи на ФФМ. Дали Пoбеда поради овој скандал ќе биде казнета и во домашното првенство, префрлање во Втората лига, одземање на бодови за новото првенство, останува да видиме што ќе се случи. Скандалот со Победа е голем, на потег е Фудбалската федерација на Македонија бидејќи целата оваа афера не смее да се забошоти во интерес на иднината на македонскиот фудбал.

Инаку, како што сега стојат работите во баражот Пелистер ќе игра со Шкендија, Металург (Победа) против Брегалница од Штип, по еден меч на неутрален терен.