„Арапска ноќ“ за јубилејот на Турски театар

Премиерата на Слободан Унковски ќе се одигра со измени што беа направени во последен момент, без музика и со една асистентка на режијата

Невена Поповска

Турскиот театар, 60 годишнината од своето постоење ќе ја заокружи со премиерата на претставата „Арапска ноќ“ која ќе се игра в сабота во 19,30 часот, но со измени кои се случија во последен момент. Имено, откако вчера директоро�� на Театарот, Атила Клинче, режисерот Слободан Унковски и дел од актерската екипа одржаа средба со новинарите, на која покрај деталите за претставата беше најавено дека по прес-конференцијата ќе продолжат со пробите за „Арапска ноќ“, стигна известување дека на претпладневната проба е одлучено претставата да се игра без музика, така што музичарот Јордан Костов е избришан од списокот на авторите, како и асистентката на режија, Александра Кардалевска.

Турскиот театар во текот на 2010 година, со неколку премиери, го одбележа шеесетгодишниот јубилеј, а за заокружување ја одбра токму претставата „Арапска ноќ“ од Роланд Шимелфенинг, во режија на Слободан Унковски. На премиерата организаторот очекува да присуствува највисокиот политички врв, како и истакнати претставници на културниот живот во земјава, на кои ќе им бидат врачени плакети и монографија за Турскиот театар.

Директорот на театарот, Атила Клинче, задоволен од досегашната соработка со Слободан Унковски, истакна дека со големо задоволство би работеле и во иднина.

„Роланд Шимелпениг е еден од водечките германски автори, кој истовремено е посебен и специфичен, со поинаква естетика, поинаков јазик и структура“, рече режисерот Слободан Унковски. „Текстот за ’Арапска ноќ‘ е напишан во 2001/2002 година. Тој е интересен по тоа што се бави со осаменост, со луѓе во голем град и со мултикултурни пристапи. Има пет лика кои ги играат десет актери. Се обидовме во таа структура да направиме посебен начин на игра, пристап кој е малку поинаков од она што сме го гледале до сега кај нас“.

Претставата е статична и актерите работеле на големи емоции и промена на расположение. Во претставата има пет судбини, пет луѓе кои се движат паралелно и скоро да нема директен дијалог меѓу ликовите. Унковски рече дека му било задоволство што работел со млада група актери кои вложиле голема енергија и напор за да ги совладаат неговите различни барања. Според него, по претставата никој нема да остане рамнодушен и таа е автентичен производ на Турскиот театар и на неговиот начин на мислење. „Претставата се вика ’Арапска ноќ‘ не затоа што се случува во некоја арапска земја, туку се случува во голема зграда во Германија каде живеат и Арапи, Германци и други, каде судбините меѓу минатото, сегашноста и соништата се мешаат и создаваат една друга реалност. Ова е една од ретките драми каде драмското време е растегнато“, рече Унковски. На прашањето, како се одлучил за текст од Роланд Шимелфенинг, Унковски рече: „Тешко е да се најде добра драма. Текстот на претставата „Арапска ноќ“ артикулира енергија која кореспондира со овој простор. Допира различни состојби на луѓе и одговара на ансамблот со кој сакав да ја работам претставата“.

Актерската екипа ја сочинуваат: Танер Сулејман, Осман Али, Зубејде Селимовска, Несрин Таир, Сузан Акбелге. Билјана Јовановска, Селпин Керим, Неат Али, Ерман Шабан и Аксел Мехмет.

Преводот на турски јазик е на Ѓул Беновенли, сценографијата и костимографијата се на Александар Ношпал, а асистент на режија е Билјана Радиноска.