Гасот ќе стигне за три дена
Ова ќе биде веројатно најбрзо воспоставената мониторинг - мисија на Европската унија
Брисел - Европа ќе добие гас за три дена ако се исполни договорот на Брисел со Москва и Киев постигнат прексиноќа со силна дипломатска иницијатива. По разговорите што траеја до доцна ноќта и телефонските убедувања меѓу челните луѓе на ЕУ и рускиот и украинскиот естаблишмент, објавено е дека тогаш кога посматрачите на ЕУ, заедно со тие од Русија, се распоредат на влезната и излезна точка на гасоводот, Москва ќе ги одврти вентилите за да протече гасот што треба да спаси од мрзнење илјадници граѓани во Источна Европа и Западен Балкан.
Ова ќе биде веројатно најбрзо воспоставената мониторинг-мисија на Европската унија, која почна трка со време и со часови за што поскоро да се задоволи Москва и да тргне гасот од Русија кон Украина, бидејќи до целта во Европа му треба пат од 66 часа. Кога точно ќе се случи тоа, вчера не беше можно да се каже, а без одговор останаа и прашањата дали ЕУ понудила финансиска помош да се одблокира спорот и дали Москва ќе чека навистина да се распоредат сите посматрачи, па да го одврти вентилот на гасоводот, или ќе го одврти веднаш, како што претходно навести кон Романија, како земја што ја смета за дел од својата политичка орбита. Главната цел на Брисел, повторена повеќепати вчера, беше да се спречи натамошното енергетско исцрпување на земјите-членки на Унијата и мрзнењето на граѓаните, па во тоа брзање немаше време за форма и за процедура, ниту пак за потпишување на договори кои би гарантирале дека ваквата драма нема да се повтори и во иднина. Портпаролот на комесарот за енергија во ЕК вчера објави дека мониторите се веќе во Украина и дека ќе останат во мисија се' додека е потребно да го контролираат количеството на гасот што влегува од Русија и излегува од Украина. (С.Ј.) |
